Hriselna atana thalo tlansan ngam a ngai - CM

Chief Minister Zoramthanga’n Cancer vei tam zawnga India State a kaihruaitu nihna thlak turin hriselna atana thalo chin hrang hrang tlansan ngam a, indo puan a ngai, a ti.

Tuipuiral Zirlai Pawl (TZP) General Hqrs., Aizawl ten Inrinni kalta-a Aizawl Chanmari YMA Hall-a Fresher’s Social 2022 an buatsaih a hmanpuina ah he thu hi sawiin Chief Minister chuan zirlai kalkhawmte chu Zu, Ruihhlo leh Vaihhlo leh a kaihhnawih laka fihlim turin a chah a. Heng chin thalo te hi mahni nih theih leh tih theih tur te ni theilo, ti theilo a min siamtu a ni tih hre renga nun uluk a invawn a pawimawh thu a sawi a. Chief Minister chuan Freshers te chuan chang bul thar an tan chu mawi taka a tlipna an siam ngei a beisei thu a sawi. 

He hun hmanpuitu dang East Tuipui bialtu MLA Ramthanmawia pawhin zirna in hma a sawn theih nana kawng hrang hranga sawrkarin hma a lak dan leh, a bik takin bial chhunga zirna hmasawnna kawnga TZP te tawiawmna chu lawmawm a tih thu a sawi a. Mi entawntlak tak tak leh eizawnna kawnga chhuanawm tak tak an lo chhuak zelte chu lawmawm tiin, hmasawnna hmuh zel a beisei thu sawiin thalai kalkhawmte hnenah chuan an awm dan leh Pathian thu lo inmawi zel se tiin a chah a ni.

He hunah hian HSLC leh HSSLC Exam 2022-a an bialchhung atanga Distinction a pass mi pali (4) te hnenah MLA Award hlan a ni a. Hemi atan hian bialtu MLA chuan Laptop pein Undergraduate Exam a Rank Holder te hnenah lawmman pek ni bawkin, Rank Holder pali (4) an awm a. Anni bakah hian zirna sang zawka hlawhtinna changte hnenah lawmpuina hlan a ni bawk.