Health Department in Immersion Training an nei

ECHO India leh National Health Mission (NHM) Mizoram tangdunin an buatsaih Health Department Official-te tana ‘Immersion Training’ chu nimin khan Health & Family Welfare Minister Dr. R. Lalthangliana chuan a hawng.

Ni 2 awh tur he training hawnna Floria Hotel, Zarkawt a neih ah hian Health Minister Dr. R. Lalthangliana chuan mipuite, a bik takin mi harsa leh dinhmun hniam zawka awmte hnena hriselna endik leh enkawl hna thawha, hriselna tha tak nena an awm theihna tura hmalak chu Health Department mawhphurhna lian tak leh pawimawh ber a nih thu a sawi a, hemi ti hlawhtling tur hian Health Department hnuaia thawkte thiamna tuaihriam leh an inrintawkna tihngheh a, an hnathawhna kawnga harsatna awm thei te hneh taka hmachhawn thei tura inbuatsaih hi a pawimawh hle a ni, a ti a. Technology lamah thiamna a sangin hmasawnna a thang chak em em a, a bik takin internet hmang tangkaia damlo enkawl leh mipuite tana rawngbawl hi a pawimawh lehzual ta hle tih sawiin, ECHO, India in hemi kawnga Health Department a thawkte zirtirna an buatsaih hi a lawmawm takzet tih a sawi bawk.

He hunah hian National Health Mission (NHM) Mizoram-a Managing Director Dr. Eric Zomawia chuan Technology hmasawn zel umpha chung leh hmang tangkai chunga Mizorama hriselna tihhmasawn leh hmalakna tihchangtlun hi a pawimawh takzet tih sawiin, an za vaiin intuaihriam an mamawh thu leh ECHO Model hmanga hetih kawnga hmalak hi a awlsamin a tangkai takzet tih a sawi bawk a ni.

ECHO Model hian Healthcare Professionals - Doctor, Nurse, ASHA leh Community Health Worker-ten mipuite, a bik takin mi harsa leh dinhmun hniam zawka awmte hnena hriselna endik leh enkawl hna thawh awmze nei leh felfai zawka an kalpui theihnan ‘case-based’ zirna a kalpui a, he an ruahmanna hi COVID-19 hripui len nasat lai bakah Tuberculosis, Cancer vei zawnchhuah leh Mental Health chungchangah pawh hlawhtling takin an lo kalpui tawh a ni. Kum 2019 khan Ministry of Health and Family Welfare (MoHFW), Govt. of India nen MoU ziakin National Healthcare Programme engemawzatin he Model hi an chhawr tangkai mek bawk a ni.

Comments

Popular posts from this blog