Bawlhhlawh paihna tlawh

ZPM MLA te chuan nimin zing khan Tuirial-a Aizawl khawpui bawlhhlawh paihna hmun, Solid Waste Management Centre (SWMC) chu a hmunah an tlawh.

SWMC an tlawhna ah hian ZPM Leader Lalduhoma chuan Gate-a luh chiah hian a hmun tura ruahman ni miah lovah bawlh-hlawh a vum thur tih sawiin, “Kawng sirah bawlh-hlawh a an chhek mai mai a, kal harsa khawpin a awm a, he kawr hian Tuirial lui a fin a; kan luidung-a bawlhhlawh paih lo tura min zirtirtu ber sawrkar ber hian luidungah kan bawlhhlawh te a nawr liam hmiah hmiah a, a dik lo hle a, hei hi a pawi em em a ni,” a ti a. Tunah hian District Hqrs. panga-ah SWMC tur hi cheng nuai 60 theuh pein hma an laktir thu leh hengte hi chak zawka hma kan lak loh chuan kan ram leilung kan tih-chhiat mek thu te a sawi bawk a ni.

Dr. Vanlalthlana MLA pawhin SWMC hi an veina a rei tawh thu leh Assembly Session-ah pawh an lo sawi fo tawh thu sawiin, tunah hian enkawltu nei lo ang maiin a awm niin a sawi a. “ Mipuite bawlhhlawh min thliar hrantir laiin SWMC lamah erawh bawlhhlawh pawh thliar hrang mumal tawh lovin, a remchanna  apiang ah an paih mai mai tawh a ni ber a. Heng bawlhhlawh te hi lui kawr lamah paih liamin kan luitui leh nungchate tana hlauhawm thei dinhmunah a ding niin kan hria a, ennawn a tul hle a ni,” a ti bawk.