Faina kawnga khawpui hrang hrang inelna tur ‘Mizoram Khawpui Fai Intihsiakna’ hawn a ni

Kum 2017 atanga buatsaih thin ‘Mizoram Khawpui Fai Intihsiakna’ chu kumin ah pawh neih leh tur niin nimin khan a khuhhawnna neih a ni a, India ram khawpui fai endikna, Swachh Survekshan 2023 Toolkit Mizo Version leh Mizoram Khawpui Fai Intihsiakna 2022 endikna tur MCC-22 Assessment Framework te tlangzarh nghal a ni bawk.

UD&PA Department hnuaia Swachh Bharat Mission (Urban) in kumin-a Mizoram Khawpui Fai Intihsiakna a buatsaih hawnna hun hi nimin khan Directorate of UD&PA, MINECO-ah biakhmuhtheihna hmanga neih niin UD&PA Director leh Swachh Bharat Mission (Urban) State Mission Director ni bawk H. Lianzela chuan a kaihruai a, Lalmalsawma Pachuau, Secretary, UD&PA chuan he hun hi khuallian nia hmanpuiin Faina kawngah Mizoram in hmasawnna tam tak a neih tawh laiin hmabak tih tur tam tak kan la nei tih sawiin, kan ram chhunga hmun nuam leh len khawthawnna hmun kan neihte kan enkawl fai lo a, bawlhhlawh leh hnuam hnawk hmuh tur a tam hle, hemi kawngah hian hmasawn kan ngai, tiin hman khat daih Plastic hman khap a ni chunga zawm a hlawh lo te pawh ngaih pawimawh a tul thu a sawi bawk.

Mizoram Khawpui Fai Intihsiakna 2022 hi August ni 1 atanga December ni 31, 2022 chhunga neih tur niin kum danga la tih ngai loh Online assesment telh thar a ni a, August atanga October chhungin 'Online Assessment' neih tur niin November leh December thla chhungin endiktu ten a hmunhma a taka tlawhin 'Onfield Assessment' neih a ni ang.

Kumin intihsiakna-ah hian Mizoram khawpui (Notified Towns) 28 te Category 3 ah thenhran an ni a. Category-I ah Aizawl khawpui chhunga AMC Ward hrang hrangte an intihsiak anga, Category-II ah District Headquarters sawm (10) te telin Category-III ah khawpui dang zawng - Vairengte,Tlabung, N. Kawnpui, Thenzawl, N. Vanlaiphai, Darlawn, Zawlnuam, Biate, Khawhai, Sairang, Lengpui, Bairabi, West Phaileng, Kawrthah, Ngopa, Phullen leh Farkawn te an tel dawn thung a. Category tinah hian lawmman pakhatna atanga pathumna siamin lawmman chi dang pawh semchhuah tura ruahman a ni.