COVID-19 enkawllai 65 awm

Nimin khan Serchhip District-ah COVID-19 hri kai mi 8 hmuh belh niin mi 23 te enkawl dam an ni a, hri kai enkawllai mi 65 an la awm mek a ni.

Nimin khan Serchhip District-ah hri kai mi 8 hmuh niin heng te hi khaw 5 atanga hmuh te an ni a, East Lungdar khua ah hri kai mi 5 hmuh niin Ngentiang leh Serchhip Tuikhuah Veng-ah hri kai mi pakhat ve ve hmuh an nih bakah Ser-chhip District pawnlam, South Khawlek khaw mi hri kai pakhat hmuh a ni bawk.

Nimin khan Serchhip District-a hri kai enkawl dam mi 23 an awm belh ve leh bawk a, heng te hi Thenzawl-ah 14, Serchhip P&E Veng, East Lungdar, North Vanlaiphai leh Bawktlang-ah mi pahnih theuh leh Serchhip Leisang Veng-ah mi pakhat te an ni.

Heti hian nimin tlai thleng khan Serchhip District-a COVID-19 hri kai hmuhchhuah tawh chu 14,367 niin an zinga 14,267 chu enkawl dam an ni tawh a, hri kai hmuhchhuah atanga chhutin za zela 99.30 chu enkawl dam ni tawhin hri kai enkawllai mi 65 an la awm a, hri kai te zingah mi 35 an boral tawh bawk a ni. Serchhip District-ah Thenzawl khua chu hri kai enkawllai tamna ber la niin mi 29 enkawllai an la awm a, Serchhip-ah mi 12 leh East Lungdar-ah mi 11 enkawllai la awmin Ngentiang-ah 5, North Vanlaiphai-ah 4 leh Khawlailung, Lungpho, Sailulak leh South Khawlek khua ah mi pakhat theuh enkawl an la ni.

Comments

Popular posts from this blog