‘Government Sector Initiative in Skill Development’ Award lawmna LESDE Minister hovin neih a ni

Labour Employment Skill Development & Entrepreneurship (LESDE) Department changtu Minister Lalchhandama Ralte chuan Skill Development-a an thawh that avanga India ram-a ber nihna lawmman ‘Government Sector Initiative in Skill Development’ Award an dawng thei chu lawmawm a tih thu a sawi.

Labour Employment Skill Development & Entrepreneurship (LESDE) Department in kumin June thla a 24th World Education Summint 2022, Hyderabad-a neiha ‘Government Sector Initiative in Skill Development’ Award an dawn lawmna programme nimin-a ITI Auditorium, Aizawl-a neih ah he thu hi sawiin LESDE Minister chuan hemi kawnga thawktu zawng zawng te a lawmpui thu a sawi a. ITI atanga training chhuak tam tak ten Mizoram chhungah hlawhtlinnna kawng hrang hrangah an hmu tih sawiin, Banking lamah te, Electronic lamah te, sawrkar Office thleng pawhin an luah a, Mizoram economy thanna kawngah pawh an thawh hlawk hle, a ti a. ITI hmunhma te fangin thawktute dinhmun leh facility neih dan te, thalai ten an bawh em tih te leh hmalak zel dan tur atana puitu nih beiseia an fan kual thu Minister hian sawiin, Sawrkar chuan ITI tihchangtlunna tur sum cheng nuai 77 a release thu leh ITI-a mamawh tur hmanrua leh hmunhma tlabal zual te siamthat nan hman a ni dawn tih a sawi bawk.

LESDE Minister chuan Minimum Wages rate ennawn a nih thu sawiin, a mawhphurtuten uluk taka ruahmanna an siam hnuah Minimum Wages rate thar pei fel a ni a, Cabinet ngaihtuah turin ruahman mek a ni, a ti a. Mizoram Building & Other Construction Workers Welfare Board (MBOCWWB) chhunga hmalaknaah member inspection neih a ni a. Khawpui chhungah members ennawn hna thawh zawh tawh niin khawpui pawn lamah ennawn a ni leh dawn tih a sawi bawk.

Nimin-a he hun hman hi LESDE Secretary Lalramsanga Sailo chuan kaihruaiin Man Power Development Board Vice Chairman Zothantluanga MLA chuan thu a sawi bakah LESDE Director K.Lalhmingliana’n report a pe bawk a. LESDE hian PMKVY Scheme an kalpui tha hle a, mi sing chuang tan Skill Training hlawhtling takin an pe a. Hmun hrang hrangah hnathawhna tur placement an hmuhsak a. Skill Competition-ah achievement tha tak neiin Pum leh Kawtchhuah Start Up Competition te hlawhtling takin an buatsaih a ni.

Comments

Popular posts from this blog