Kawn Veng FC te an champion

Independence Day/Screening Football Tournament 2022 2nd Division-ah Kawn Veng FC (Chhiahtlang) chu champion in Vawiin hian 1st Division Final khelh leh a ni ang.

Serchhip District Football Asssociation (SDFA) buatsaih  Independence Day/Screening Football Tournament 2022 2nd Division Final hi Inrinni chawhnu khan Serchhip Sports Complex-ah khelh niin Keitum FC-I leh Kawn Veng FC (Chhiahtlang) an inhmachhawn a, he inkhel ah hian Keitum FC-I hian inkhel thunun zawk mah se Kawn Veng FC lam hian goal khung theihna hun remchang an nei tam zawk a, hun pangngai khelh chhung zawnga goal khung thei an awm loh avangin Extra-Time khelh leh a ni a, minute 20 an khelh chhunga goal khung thei an la awm chuan loh avangin Penalty Shoot-out hmangin chak zawk zawnna neih a ni a, Keitum FC-I tana pet zinga goal-a chantir thei an awm lova, Kawn Veng FC lam hi 2-0 in an chak ta a ni.

2nd Division-a Champion Kawn Veng FC te hi 1st Division-ah an kaisang nghal a, Final a chak zo lo Keitum FC-I te hian tukin dar 7:00 hian 1st Division Play-off an khel leh nghal dawn a, 1st Division-a 7-na ni ta AWC FC chu hmachhawnin heta chak zawk zawk hi 1st Division-ah an awm anga, a chak lo zawk erawh 2nd Division-ah an awm dawn a ni.

Vengchung FC ten Final an khel dawn :

Inrinni khan 1st Division Match hnih khelh niin Vengchung FC chuan si hnih fai-a AWC FC hnehin Final an lut a, Final-ah hian Hmar Veng FC an hmachhawn dawn a ni. He inkhel ah hian Vengchung FC tan Jerry Laldikkima leh Remlalruata ten goal an khung a, khelh 7 an khelh ah point 14 hmuin point 14 bawk hmutu New Serchhip FC aiin Goal Difference-ah an that zawk avangin Final an lut ta a ni. He inkhel a chak zo lo AWC FC erawh khelh 7-ah point 7 hmuin 1st Division Play-off an khelh a ngai a ni.

Inrinni-a inkhel dangah Chhekhnai FC chuan Bungpui FC chu 5-3 in an hneh a, Chhekhnai FC goal zawng zawng hi Lalthuthlunga khung vek niin Bungpui FC tan Lalsiamkima, Lalrammawia leh Vanlallawma ten goal khat theuh an khung a, Bungpui FC hian maatch 7 an khelh ah hneh pakhatmah nei lovin 2nd Division-ah an tla a ni.

Vawiin-a 1st Division Final khel tur Hmar Veng FC leh Vengchung FC te hi lo inhmachhawn tawhin Vengchung FC hi si hnih faiin an lo chak tawh a, hei hi tun Tournament-a Hmar Veng FC chak loh awmchhun a ni.