Emergency Response Vehicle (ERV) 12 te State leh District hrang hranga hman turin vailiam

Disaster Management & Rehabilitation changtu Minister leh Home Minister Lalchamliana chuan nimin khan rikrum thil leh chhiatrupnaa a thlen thula a tula an hman turin Emergency Response Vehicle ERV (Mahindra Bolero Camper) sawm pahnih (12) chu Zero Point MINECO atangin a vailiam.

Disaster Management & Rehabilitation Department hnuaia State Emergency Operation Centre (SEOC) leh District tin Disaster Management Authority-a District Emergency Operation Centre (DEOC) ten rikrum thil leh chhiatrupnaa a thlen thula a tul anga an hman tur Emergency Response Vehicle ERV (Mahindra Bolero Camper) vailiamna puala inkhawm ah hian Home Minister Lalchamliana chuan tunhnaiah Mizoram-ah leimin leh Road accident vangte in chhiatna hrang hrang a thlen thu leh heng chhiatna tuartute a tawrhpui thu a sawi a. Leimin tam zawk hi chu mihring in leilung kan tih danglam vanga thleng nia a lan thu sawiin, hmasawnna leh kan nitin mamawh atana kan chet chhuahna ah te mahni chhiatna inthlen lo tura fimkhur tlan a pawimawh zia a sawi a. Tunhnaiah State Sawrkarin Disaster Mitigation Fund hnuaiah chhiatna thleng thei hrang hrang venna atan hna thawh tur cheng nuai 780 vel a ruahman tawh thu leh, SEC in a pawm tawh a ni tih a sawi bawk.

DM&R changtu ni bawk Lalchamliana chuan 15th Finance Commission in Disaster Management-a kan hman turte tha thawkhat takin ruahmanna min siam sak tih sawiin, SDRMF tiin kumin ah cheng vaibelchhe 45 vel hmu turah an in beisei thu a sawi a. Kaihhruaina fel tak siamin pawisa hman dan tur min siam sak a nih thu a sawi bawk. DM&R chu Department lian a nih loh avangin DDMA Staff tlemte leh an State Disaster Response Force te bakah tlawmngai pawl YMA te chu chhiatna thlengah a che hmasa an ni thin tiin Aapda Mitra Volunteers training hmang te in YMA member te training pek thin an nih thu a sawi a. DM&R Minister chuan tlawmngai pawlte thawhpui zelah sawmin, a theih anga thuamthat zel pawh sawrkarin a duh thu leh heng ERV motor te hi dik leh tangkai taka hmang turin DDMA te chu a chah bawk a ni.

Central atanga pawisa dawn State Disaster Response Fund pung tlingkhawm atangin heng ERV te hi lei niin July 1, 2021 khan Disaster Management & Rehabilitation Minister hian Mizoram Fire & Emergency Service thuam chak nan Kangthelh motor tha chi, High Pressure Pump Fire Tender lirthei 3 (pathum) chu a lo hlan tawh bawk a. Hei bakah hian Mizoram a Tlawmngai pawl lian Central Young Mizo Association hnenah pawh July 22, 2020 khan Emergency Response Vehicle hi pakhat (1) hlan a lo ni tawh bawk a ni.

Comments

Popular posts from this blog

Volleyball S/F khel dawn