Zangnadawmna pe tura sawrkar an phutna ngaihvenin Congress Thalaite an pungkhawm

Kumin May ni 27-a Excise Department-in Millenium Centre-a Grape Wine an man sak zinga mi, tunhnaia Stroke vang boral Lalhriatpuii zangnadawmna cheng nuai 100 pe tura Congress Thalai ten sawrkar an phutna chungchang ngaihvenin nimin khan Congress Thalaite chu Secretariat Pisa tual-ah an pungkhawm.

Congress Thalai te hian niminpiah khan Excise & Narcotics Minister Dr. K. Beichhua hnenah Lalhriatpuii chhungte hnenah zangnadawmna cheng nuai 100 hi nimin chhun dar 12:00 hma ngeia pe turin an lo phut tawh a ni. He an thilphut ngaichang hian nimin chawhnu dar 1:00 vel khan Congress thalai te chu Secretariat Pisa tual-ah hian an pungkhawm a, he hunah hian MPYCC hruaitute chuan Excise Minister hmu tur emaw, buaina siam tum emaw-a pungkhawm an ni lo tih sawiin, an thilphut chu Sawrkar-in a tihlawhtlin dawn leh dawn loh ngaichang-a kal an ni tih an sawi a. Sawrkar thutlukna chu engpawh ni se Excise Minister hnen atanga Sawrkar thutlukna hriat tumin an nghak a. Darkar 2 vel an nghah hnuah Excise Minister Dr. K. Beichhua chuan a PS leh MNF Party hruaitu pakhat tirin Congress Thalai hruaitute chu an thilphut chungchang sawipui turin a sawm a, Congress Thalai chuan Minister hmuh tuma kal an nih loh avangin Minister sawmna hi an pawm thei lo a, hemi hnu hian Congress Thalai chu an punkhawmna atang hian an tin darh zui a, an kal zel dan tur relin Congress Bhavan-ah an thukhawm nghal a ni.

Secretariat Pisa tual-a an punkhawmna ah hian MPYCC President, Dr. Lalmalsawma Nghaka chuan, Congress Thalaiin hetianga hma an lak chhan hi buaina siam an duh vang emaw, Politics-a hamthatna lak an tum vang emaw a ni lo tih sawiin, Lalhriatpuii chu dik lo taka puh a nih thu leh dan phal loh Zu zuar ang hial-a puh a nih avanga a rilru hrehawm lutuk kal zel chu a nunna thlengin a tawrh phah a, a zahawmna humhim sak turin hma an la tih sawi a. Zangnadawmna cheng nuai 100 pek an phut chungchangah nunna chu sum nena teh chi a ni lo tih pawh a sawi. Excise Department-in Grape Wine an man chungchangah Excise Minister-in thudik tawk lo sawi a Zu man sak anga a puh chu Congress Thalai chuan an hrethiam thei lo tih pawh sawiin, tun thleng thil awm dan dik tak Sawrkar-in a la puang duh lo leh zel phei hi chu mak an ti hle tih a sawi a ni. Congress Thalai President chuan, Mizoram in dikna a mamawh tawh avangin an hmalakna chu an chawlhsan mai dawn lo tih pawh sawiin, he thil thleng mai ni lo, thil dangah pawh hma an la zel dawn tih a sawi a. Tun ang renga Mizoram hi kaihhruai a nih chuan nakin lawkah ram hlawhchham ber, ram hrehawm ber a la nih thuai dawn avangin Sawrkar khalh ngil turin hma an lak zel dawn thu leh tuna an hmalakna hi chu a bultanna chauh a la nih thu a sawi a ni.