NEUM te tiamchin awm lovin nuar zel dawn; Vawiin a hna zawmlo te chungah dan anga hmalak tum a ni

National Health Mission (NHM) Employees Union Mizoram (NEUM) te chuan ni 3 chhung a huho-a chawlh an lak hnuah Vawiin atang hian tiamchin awm lova chawlh chhunzawm an tum a. Hetihlai hian Mizoram sawrkar chuan Vawiin atanga hna zawm lo te chungah dan anga hmalak a nih tur thu a sawi thung.

National Health Mission (NHM) hnuaia thawktu inzawmkhawm, NEUM te hian Hlawh an lak mumal loh thin chungchang ah te, rei tak lo thawk tawh te a ngheta luh theihna kawng siam turte, Medical Reimbursement an neih ve nan te, Health Department a hna lak a awm ah engemaw zat an hauh ve theihna tur te leh Transfer TA/DA an neihna tura an thlen thin te tih thlawhtlin ala nih loh avangin tunkar Thawhtanni atang khan ni 3 chhung a huho-a chawlh lain sawrkar hi an lo kar tawh a, chawlh an lak tawp ni, nimin khan thuchhuah siamin Mass Casual Leave an lak chungchangah hian tunkar Thawhlehni zan khan Deputy Chief Minister hovin Health Department hotu lian te nen thutkhawm an neih thu leh he thutkhawm minute nimin, July 13, 2022-a lo chhuakah NEUM ten an demand hrang hrang atana an lungawina khawp an hmuh loh avangin Mass Casual Leave lak hi zo tawh mahse Indefinite Strike neih chhunzawm mai nise tiin NEUM Executive Committee chuan an rel tih an tarlang a. Mass Casual Leave leh Strike an neih avanga mipuiten hriselna kawnga harsatna an tawh palh theih chungchangah mipuite hriatthiamna an ngen bawk a ni.

Hetihlai hian nimin khan Under Secretary, Health & Family Welfare Department chuan National Health Mission (NHM) Mission Director hnenah lehkha thawnin NEUM te thil nawr chungchangah hian sawrkar in theihtawp a chhuah sak thu leh an hlawh pawh April leh May pek tawh niin June thla leh a hnu lam atan an hlawh tur pawh chak taka ngaihtuah sak niin hotuten thil awmdan vawi tam tak an hrilhfiah tawh thu a tarlang a, heti chunga an nawrhna an kaltlangpui leh Vawiin, July 14, 2022 atanga tiamchin awm lova nawrh chhunzawm an tum chu sawrkarin pawi a tiin a hrethiam lo takzet tih a tarlang a.

Hei vang hian damlote leh mipui tawrhna a zual zel loh nan NHM hnuaia thawktute hi Vawiin, July 14, 2022 atanga dan pangngai a an hna chhunzawm theuh tura lo hriattir tura ngenin, hna zawm lo an awm anih chuan an chungah sawrkar in dan angin hma a la ang tih a tarlang a, an hna an zawm ngei em tih report thehlut turin a hriattir nghal bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar