Gorkha hlaphuah thiam Bhanu piancham lawmna Mizoram Governor hovin neih a ni

Gorkha te tana ziak leh chhiar bakah hnam hmasawnna kawnga thawh hlawk tak leh thu leh hla lama mi ril, Adi Kavi Bhanu Bhakta Acharya piancham vawi 208-na lawmna hun chu nimin khan Aizawl-ah Governor Hari Babu Kambhampati hovin neih a ni.

Mizoram Gorkha Youth Association (MGYA) buatsaiha Vanapa Hall-a he hun hman hi MGYA (C) President Anup Chhetri chuan kaihruaiin he hunah hian Governor Hari Babu Kambhampati chuan Adi Kavi Bhanu Bhakta Acharya hnathawh te leh a sulhnute chu Gorkha te tan a hlu tih sawiin, Bhanu in Sanskrit atanga Nepali tawng-a Ramayana a lehlin hnu atang hian Nepali tawng in nasa takin hma a sawn phah thu leh tunah phei chuan Nepali tawng chu India Danpui chhunga 8th Scheduled-ah sawrkar hriatpui tawng hrang hrang zinga pakhat a lo ni ta tih a sawi a. Hei hi a ropuiin he hriatpuina pawimawh tak hian hlawkna tam tak a keng tel a ni, a ti.

Governor chuan Gorkha te chu khawvel ram hrang hrangah awm darh mahse an awmna hmun apiangah midangte nen inrem takin an chengho thei zel lai chu an ropuina a nih thu pawh sawiin, Mizoram-ah pawh Gorkha te chu rei tak lo awm tawhin Mizote nen inngaih takin tun thlengjn an cheng ho zel tih a sawi a. He inunauna leh inremna lawmawm tak hi chhawm nun zel a nih theih nan Gorkha thalaite pawh vantlang tana luanchhuah leh hna tha thawh kawngah theihtawp chhuah zel turin a chah bawk a ni.

Mizoram-ah chuan Gorkha chu hnam tlem zawk niin tunah hian mihring singhnih bawr vel chiah ni mahse Mizoram hmasawnna atan chuan tih theih leh theihna sang tak nei nia a hriat thu Governor chuan a sawi a. Hnam tlem zawk te an nih avanga engemaw harsatna an neih theih ang te pawh lo zirchian a, siamrem ngai lai te pawh sawrkar thuneitute lo sawipui a tum thu a sawi a. Gorkha te chu hnam huaisen, rinawm leh ralvengtu atana khawvel puma rinkai an ti tih sawiin, tumruhna leh taihmakna nei chunga hmalam pan zel tur leh zirna lamah tan la zual turin Gorkha thalaite chu chahin, zirna leh thiamna hi hmasawnna kawng hawngtu leh tumahin an dal theih loh a ni tiin a fuih bawk a ni.

Adikavi Bhanubhakta Acharya hi Nepal rama Tanahu District-a Chundi Ramgha khuaah kum 1814 khan a piang a, Puithiam chhungkua an nih avangin a hranpain sikul kal lo mah se a pa zirtirna avangin ziak leh chhiar lamah a thleng sang hle a. Thu leh Hla lamah hnutchhiah tam tak neiin khawvelin a hriat larna chhan ber chu Hindu Sakhaw Lehkhabu Thianghlim, ‘Ramayana’ Sanskrit tawng harsa tak atanga Nepali Tawng-a a lehlin avangin a ni. Gorkha hnahthlak hnam hrang hrang te inkara inpumkhatna siamtu ah a ngaih niin kum 1868 khan a thi a ni.