Tlawng lui fintu lui hrang hrang thenfai hnatlangpui PHE Department leh YMA bultumin neih a ni

Co-ordination Committee PHE Department leh Central YMA buatsaihin Inrinni khan Tlawng Lui Fintu Lui Thenfai Hnatlangpui neih a ni a, he hnatlang-a thawkchhuakte hi PHE Department changtu Deputy Chief Minister Tawnluia chuan vailiamin bawlhhlawh paih kawngah mitinin mawhphurhna kan nei tih a sawi.

Tlawng Lui Fintu Lui Thenfai Hnatlangpui-a thawkchhuakte vailiamna puala inkhawm tawi Aizawl Vanapa Hall kawt-a neih ah Deputy Chief Minister chuan Tlawng Lui hi Zobawk dai atanga hnar neiin, Cachar ramri thlenga luang, KM 186-a thui niin District 5-a khua 90 chuang paltlang Lui a ni tih sawiin, Mizoram Lui pawimawh leh a bikin Aizawl leh Lunglei District-ah phei chuan kan rin rawl, tui intur min chawmtu tih theih a ni tih a sawi a. He hnatlangpui in a tum chu Tlawng Lui Fintu Lui hnar lo tih fai lawk a, Tlawng-ah tui thianghlim zawk mipui tan hnianghnar taka a awm theihnan leh luitui a bawlhhlawh tam ber Plastic atanga thil siamchhuah hman tlem inzirtir a ni tih sawiin, “PHE Department Engineer ten nitin Tlawng Lui tehin record tha tak an nei a, heng record atanga a landanin Thal laiin tui kan nghei hlauhthawn awm chang a awm thin a, hei hian tui hna venhim bakah vawnhim leh humhim a tul zia a tarlang,” a ti a, he hnatlang hi tih makmawh leh hnatlang la neih zel tur a ni tih a sawi bawk.

Tlawng lui fintu lui thenfai hnatlangpui hi hmun hrang hrang- Sakhisih Lui Kulikawn; SAI thlang Mission Vengthlang; Tlawng Road (Reiek); Vailui Hnar, Bungkawn; Tuikual Lui Fintu, Maubawk leh MINECO inkar; Tuikual Lui, Ebenezer Hospital bulhnai; Tuikual Lui (Tuithum), Lawipu; Dinthar Lui, Ebenezer Hospital bul kawr; Hnimtheilo Lui, Chawnpui/Zonuam; Tuithum, Chawlhhmun leh Sihhmui Kai-ah Branch YMA hrang hrang 106 atangin mi 10 theuh an hnatlang bakah PHED thawktu mi 200 chuang an hnatlang a; Tlawng Lui thenfai bakah Tlawng kamah thing 250 vel phun a ni.

Inrinni vek khan Serchhip leh Lunglei District-ah te hetiang bawk hian YMA Branch hrang hrang ten hnatlang an nei bawk a ni. PHE Department leh Central YMA te hi kum 10 chuang thawhona an lo nei tawh a ni.