Hnahlan Winery in Grape lei, Champhai in lei rih lo

Hnahlan Grape Growers Society chuan kuthnathawktute Grape rah tunlai hian an lei mek a, Champhai Winery chuan July ni 13,2022 atangin Grape rah hi lei tan an tum thung.

Hnahlan Grape Growers Society hruaitute chuan tun dinhmunah Grape rah quintals 160 an lei tawh tih sawiin, heng Grape te hi an her mek a, la lei chhunzawm zel an tum tih an sawi. Zawhna chhangin Hnahlan Grape Growers Society hruaitute chuan, “Grape leina atan hian cheng nuai 60 kan dah a, kan khuaa Grape thar zawng zawng hi lei vek theih kan tum a ni,” an ti a. Kumin hian Grape rah thar quintal 800 atanga 1000 inkar vel an beisei tih sawiin, Grape rah hi kg. ah Rs. 60 zelin an lei a, pawisa pawh an pe nghal zel tih an sawi bawk. Grape rah hi kum hmasa lamah chuan kg. khat Rs. 50 in an lei a, kumin atangin Rs. 60 in an lei tan a ni.

Champhai Grape Growers Society erawh chuan Grape thar hi an la lei lo thung a, harsatna adang a awm loh chuan July ni 13,2022 atangin lei tan an tum tih sawiin Champhai Grape Growers Society hruaitute chuan, “Kuminah hian quintal 1400 vel lei tumin kan inbuatsaih mek a, tunah hian a tui dahkhawl sa la nei nual mah ila zawi zawia tihral theih kan beisei a ni,” an ti a. Grape rah chu a ba in an la dawn nia sawiin, “Kumin atang hian kg. ah Rs. 60 in lak kan tum a, mahse Grape rah leina hi kan payment thei dawn lo a. Kan Grape tui te kan hralh chho zel ang a, November ah chuan loneitute account ah thun vek kan tum a ni,” an ti bawk.

Hnahlan leh Champhai Grape Growers Society hruaitute chuan Vawiin, Thawhtanni hian Chief Minister Zoramthanga hovin Cabinet Meeting a awm dawn nia an hriat thu sawiin, an chungchang pawh an ngaihtuah ngei an ring tih an sawi a, sawrkar lakah beiseina sang tak an nei tih an sawi bawk.