Telephone Advisory Committee (TAC) thukhawm

Telephone Advisory Committee thutkhawm chu Zirtawpni khan Aizawl-ah neih niin Mizorama BSNL te hna thawh leh hmalakna hrang hrang te sawiho a ni.

SAD Conference Hall-a Telephone Advisory Committee thutkhawm hi an Chairman leh Mizoram Lok Sabha MP C. Lalrosanga chuan kaihruaiin Mizoram hmun hrang hrangah Signal that tawk loh avanga Mobile Phone hman harsatna la awmte a theih ang anga tih changtlun leh thuamthat a tul hle tih sawiin, a bik takin ramri dep hmun hrang hranga Signal awm thatloh avanga Mobile Phone hman hleih theih lohna hmunah te signal tha zawk a awm theih nan tanlak thar a tulin, hetiang hmun a hmasawnna thawk tur hian a tul ang angin hma kan lak ho a pawimawh hle a ni, a ti a. Heti rual hian heng Signal that loh leh chak tawk lohnate thuamtha tur hian sum lamah harsatna a awm avangin duh anga hma lak a harsa a, sum harsatna karah thahnemngai taka thawktu, General Manager leh a thawhpui Officer leh Staff te inpekna chu a lawmawm a, hma lam pana an thawh zelna turah a tul anga theih tawp chhuahpui a inhuam reng tih a sawi a. BSNL-in Telephone lama hmasawnna hrang hrang sawihona hun an nei leh thei chu lawmawm a tih thu leh he Meeting hian hmasawnna tha zawk a hrinchhuah belh ngei a beisei thu a sawi bawk.

Lok Sabha MP chuan Mizorama inbiakpawhna leh thu thawndarhna lamte thuamthat a nih zel theih nan Communication Minister a dawr tawh thu sawiin, BSNL hote harsatna leh mamawhte la hriattir zel a tum thu a sawi a. Mizorama Internet a lo chak zawk theihna tura Bandwidth tam zawk a awm theih nan Optical Fibre Cable la thlen lohna District zawng zawng thlen tir tura thuneitute dawr zui a tum thu pawh sawiin, Mizoram-a licence nei mumal lova Internet Connection lo pechhuak thin an awm ni a sawi chungchangah dan ang taka hmalak tul a tih thu a sawi bawk.

He thutkhawmah hian TAC Members Lalliankima, HC. Vanlalruata leh Zomuanthanga te bakah BSNL atangin General Manager hovin Officer leh Staff thahnem tak an tel a. Tun dinhmunah Mizoram pumah BSNL hnuaiah hian Mobile Connection 259455, Landline connection 6926, FTTH Connection 7885, Wi-Fi Hotspot 15, Working Broad Band 2685, Exchanges Wired 39 leh BTSs Mobile 336 a awm mek a ni.

Comments

Popular News (Last 30 Days)

Vawiin-ah HSSLC Exam result