Serchhip Police ten Rakzu um 416 zet an man
Thudawn danin Sailiamkawn Police Check Post-a Duty te hian nizan hmasa dar 1:00 leh dar 2:00 inkar vel khan Gate paltlang tur Bolero Camper (Mz-01/W-9070) chu lo enfiahin a hnunga Satha Ip hrang hrang 11-a dah heng Rakzu te hi an man a, he Motor neitu leh khalhtu Lalsangluaia (47), Vaivakawn Aizawl leh Rakzu neitu nia hriat Lalthuthlungdika (28), Thuampui Veng Aizawl nia insawi te chu man nghal niin thubuai siam sak an ni a, nimin vek khan Serchhip District Court-ah thawn nghal an ni.
Police ten thu an zawhfiahna atanga an sawi danin he Motor neitu leh Zu neitu nia hriat te hi Bualpui NG-a bungraw dah tur hian an inbe sa a, niminpiah (July 13, 2022) tlai khan Phunchawng atangin heng Zu te hi rawn phurin World Bank Road-a rawn kalpui chu Sailiamkawn Police duty te hian an lo man a ni. Heng Rakzu te hi Tui bottle a dah sa vek niin a vaiin um 416 a ni a, an lakna ah um khat hi Rs. 100/- zela lain Rs. 250/- zelin an pe leh dawn niin an sawi a ni.
Comments
Post a Comment