NEUM te chungchangah sawrkar in khawng a tum

National Health Mission (NHM) Employees Union Mizoram (NEUM) ten sawrkara an thil ngiat nawr nan tiamchin awm lova an hna an chawlhsan chungchangah sawrkarin dan angin hma a la dawn a khawng taka kal an tum tih Health Department Principal Secretary Esther Lalruatkimi chuan a sawi.

NEUM ten sawrkar laka an thilphut nawr nana chawlh an lak mek chungchangah nimin khan SAD Conference Hall-a chanchinthar lakhawmtute an kawmna Esther Lalruatkimi chuan NEUM hnathawk ten an hna an zawm leh zawm loh endiktu Controlling Officer ten an endik dawn tih sawiin, hna an zawm lo zel a nih chuan dan angin sawrkar chuan hma ala mai dawn tih zawhna chhangin a sawi a. Hetihlai hian, NHM hnuaia hnathawk te an chawlh avanga harsatna thlenlohna turin Health Department chuan Crisis Managment Plan an nei tih sawiin, Principal Director Health Department kaihhruaina hnuaiah sawrkar damdawi In hrang hrang ah te mipuiten harsatna an tawh lohna turin ruahmanna an siam niin a sawi a ni.

NHM hnuaia thawk, nuar mekte lakah hian sawrkar a khawng dawn tih Health Department Principal Secretary chuan sawiin, NHM Scheme chu hun bi nei thil, March ni 31, 2026 thleng awh tur leh thawktute pawh kum khat atana thawk tura lak an ni tih a sawi a, NHM hnuaia thawk tura an in chhawr dawnin kum khat atana thawk turin engagement order an siam a, appoinment order pek an ni lo, a ti a, engagement order ang chuan bantir awl viau mah se sorkarin awlsam taka in chawlhtir a duh lo a ni, a ti bawk. 

He hunah hian DP&AR Secretary Lalramnghaka chuan NHM hnathawkte harsatna chungchang hi Deputy Chief Minister ho in sawrkar Department hrang hrang aiawh leh anmahni, NEUM aiawh ten an sawiho tih sawiin, NHM hnuaia thawktute chauh hi sawrkar hnuaia CSS hnathawk an nilo a, sawrkar Department 16 hnuaia CSS hnathawk hi tunah mi 10,654 an awm mek a, heng hnathawk hrang hrang te hi DP&AR chuan an hlawh leh an service hrang hrangte zirchiangin an Recommendation Report pawh Chief Minister, Dy CM leh Chief Secretary hnenah an thehlut tawh tih a sawi a, Law & Judicial Department in endikna neiin Vetting an nei zo tawh a, DP&AR lamah chinfel ngaite leh enzui ngai la awm te nghah mek a ni, a ti.

Hetihlai hian sawrkar in an hna chhunzawm tura a ti chungin NEUM chuan nimin khan nawrh an chhunzawm a. NEUM President Malsawmtluanga Hauhnar chuan Mizoram puma an member ten an nawrh chu an zawm thaa an hriat thu a sawi a, nimin-ah Sawrkar nen an inbiak rih loh thu leh District tina an hruaitute Aizawl-ah inkokhawmin Vawiin ah an thutkhawm dawn thu a sawi a ni.