Sawrkar-a phut nei NHM Mizoram hnuaia thawktu ten Vawiin atangin ni 3 chhung chawlh lak aan tum

National Health Mission (NHM) Mizoram hnuaia thawktu inzawmkhawm, NHM Employess Union (NEUM) chuan sawrkar laka an thilphut nawrna atan hian Vawiin, July 11, 2022 atang hian ni thum (3) chhung a huho a chawlh lak an tum thu an sawi a, mipuite hriatthiamna an ngen thu pawh an tarlang bawk.

NEUM hian Zirtawpni khan thuchhuah siamin an harsatna hi vawi tam tak sawrkar-ah an thlen tawh thu sawiin, NEUM members te chu kum 15/20 chuang contract hna, hlawh tlemte a thawk te pawh tam tak an awm tawh thu an tarlang a, “Kan Sawrkarah hian rei tak lo thawk tawhte a ngheta luh theihna kawng min siam turte, Medical Reimbursement kan neih ve nan te, Health Department-a hna lak a awm ah engemaw zat hauh ve theihna tur te, transfer TA/DA te kan neihna turte kan thlen tawh thin a. Tin, kan hlawh lak thinte hi thla hnih thla thum dan ni lova, thla tin lak ve theih nante Sawrkarah kan lo dil fo tawh thin,” an ti a. Heng te hian tun thlenga awmzia a neih loh thu leh vawi khat tal pawh Cabinet Meeting Agenda-a an la lang lo chu hriatthiam harsa an tih thu an tarlang a ni.

NEUM chuan heng an tawrhna hi a na tâwk tawh hle nia an hriat thu pawh an thuchhuah ah chuan tarlangin, “Hreh hle mah ila kan Sawrkar-in min ngaihtuah ve theih nan Mass Casual Leave Ni thum (3) chhung lak phawt chu kan ti tlu lo thei ta lo a ni. Heng kan hmalakna in awmzia a neih loh chuan a tâwp thlenga kal hi kan tum dan a ni,” an ti.

NHM Staff (NEUM Members) te hi Mizoram pumah mi 2000 chuang kan an awm mek thu leh District tinah Doctor, Staff Nurse, Health & Wellness Officer, Health Workers, Data Entry Operator, Accountant, Administrative Staff tam tak, Group D Staff, Drivers etc. te an awm thu pawh NEUM thuchhuah chuan tarlangin, “Kan awmna te hi Directorate of Health Services, Director of Health & Medical Education hnuai - Zoram Medical College, District Hospital tinah, CMO Office, Primary Health Centre, Urban Health Centre, Health Sub-Centre, Health S/C Clinic etc. ah te kan awm vek a. Health Department chakna zaa sawmruk aia tam hi kan staff te kutah a awm a ni,” an ti bawk.

NEUM chuan tunhma atangin hna chi hrang hrang an thawhna ah pawh theihtawp an chhuah thu leh Ministry of H&FW-in lawmman a siam Mizoram Sawrkar in an lo dawn fo tawhna te chu NEUM members te thawhrah a ni an ti lo thei lo tih an sawi a. COVID-19 hri leng ah pawh he natna awmzia kan la hriatchian hma leh hlauh-awm tak nia kan hriat lai pawhin a hmatawng-a awmte chu NEUM members te deuh vek an nih thu sawiin, “Chutiang in hna dangah pawh theihtawpa mahni hna thawk tura rinawm turin kan infuih fo thin dan a ni,” an ti a, sawrkar hnathawk nghet ten hamthatna awmthei chu hrang hrang awlsam taka an dawn laiin anni chu a hminga sawrkar hna thawk ve si in dinhmun hrehawm em em ah an awm niin an sawi a ni.

Vawiin atanga ni 3 chhung Mass Casual Leave lak an tum chungchangah NEUM chuan mipuite hriatthiamna an ngen thu tarlangin, an Casual Leave dil erawh hotu sang lamin pawm sak lo turin Controlling Officer te an hriattir niin Zalen an hrilh a, chutih rualin phalsak te pawh awmin, phalsak te hi hotu sang lamin phalsak lo tura an tih hmaa an lo phalsak hman tawh niin hriat a ni a, NEUM lam chuan thuneitu sang te laka nuar an nih avangin Mass Casual Leave hi phalsak lo sa an ni thu an member te hriattirin, an chungah eng pawh thleng se ngaihthah an nih dawn lo tih leh dilna an thehlut tawh angin ngaihtha taka awm turin an member te an hriattir bakah a tawp thlenga tang thei turin an member te an chah a, an pawl member te chu an pawl thuchhuak chauh ngaihchang turin an ti a ni.