Dy. Speaker in zirlai titha chawimawina hmanpui

Serchhip District chhunga Thinglian khua a MZP te chuan nimin khan an dincham lawmna leh zirlai titha chawimawina hun hmangin he hun hi bialtu MLA leh Assembly Deputy Speaker Er. Lalrinawma chuan a hmanpui a ni.

Thinglian Community Hall-a he hun hmanna hian Deputy Speaker Er. Lalrinawma chuan hlawhtling tura rilru puthmang a pawimawh thu sawiin, kan ngaihtuahna in a thlen chin chu kan thlen chin a nih mai thin avangin sang tak thleng tura kan ngaihtuahna tihsana a hlawhtlinna tura taima taka kan beihzui a ngai thin tih a sawi a. Thinglian zirlaite chu anmahni khuaa an zir theih loh hun, College an rah hunah midangte tih theih ang chu ‘Ka thei ve a ni’ tih rilru pu ran zel turin a chah a. Tuna an hlawhtlinna hi an bultanna chauh a la ni tih hriaa, zirna sang zawkah nasa zawka bei zel turin a chah a ni.

MZP Thinglian Branch dinchampha vawi 4-na lawmna leh zirlai tithate chawimawina hun hi an President David Lalnunmawia chuan kaihruaiin he hunah hian Thinglian khua atanga kumin a HSSLC pass thar mi 7 leh HSLC pass thar mi 4 te hnenah chawimawina hlan an ni a. MHIP, YMA leh VC aiawhte pawhin he hunah hian thu an sawi bawk a ni.