Bairabi - Sairang Rel kawng siam mek nakum December-ah zawh hman tum a ni

Cheng vbc. 6,547 vel senna tur, Bairabi - Sairang Rel kawng chu nakum December-a zawh hman tum a ni tih Railway Consultant, Hrangtawna (IRTS Rtd.) chuan sawiin, hna pawh thawh mek zel a nih thu  a sawi.

Zawhna chhangin Hrangtawna chuan tunhnaia Assam tui lian leh chhiatna dang thleng vangin hnathawh engemaw chen a khaihlak ve deuh tih a sawi a, zawh hun tura ruahman, December, 2023 a nih thu leh hnathawh a kal chhoh zel thu a sawi a ni. Bairabi-Sairang Rel kawng hi Rel kawng lian chi, Broad Gauge Railway Line tur a ni dawn a, RITES-ten he Rel kawng sial Survey hna hi kum 2005 bawr khan an zofel a. Hna hi sawrkar laipuiin kum 2008-2009 khan sanction-in a tira estimate chu cheng vbc. 2,384.34 a ni a, ennawn zel niin tunah chuan cheng vbc. 6,547 bawr vel senral a ngai dawn nia chhut a ni. A hna hi kum 2015-ah khan tan niin, zaa 70 chuang hret zawh tawh a ni.

Bairabi atanga intanin Sairang huam telin Rel Station pali a awm dawn a, chungte chu Bairabi atanga a hlat zawng tehin, km 16.38-ah Hortoki Station, km 26.10-ah Kawnpui Station; km 37.12-ah Mualkhang Station leh a tawpna, km 51.38-ah Sairang Station te an ni a. Sairang Rel Station hi Terminal Station - Coaches maintenance na hmun tur anih dawn avangin Station dang 3 aia lian deuh zawk tura buatsaih mek a ni a. He Station-ah hian Passenger ten Rel an lo channa tur ringawt Platform 3 awm tura ruahman a ni a. Line 7- Passenger line 3, Bungraw phur (Goods Line) line 3 leh Maintentance & Service Line pakhat a awm dawn a. Bungraw phur bik tan pawh Goods Platform siam a ni dawn a ni.

He project atan hian Railways in ram hectare 481.18 a zau hmangin Kolasib District-ah Forest ram hectare 38.94 a zau leh Non-Forest Land mimal ram hectare 308.01 a zau leh Aizawl District-ah Forest ram hectare 35.547 a zau leh Non-Forest Land mimal ram hectare 98.595 zau an hmang a, zangnadawmna cheng vbc. 840 bawr vel ram neitute pek an ni tawh a ni.  Bairabi - Sairang rel kawng thui zawng hi km 51.38 niin, Lei dawh lian (major bridge) 55 leh Lei dawh tenau (minor bridge) 87 a awm a, hmun 32-ah leiverh (tunnel) a awm a, leiverh  zawng zawng thui/sei belhkhawm chu km 12.63 a ni dawn a. Leiverh thui ber sei/thui zawng chu km 1.88-a thui a ni.

Comments

Popular News (Last 30 Days)

LPG man bithliah thar