Online hmanga RTI hman theihna tur tlangzarh

India ram State leh Union Territory zingah RTI Online nei thei pariatna ni turin nimin khan Chief Minister Zoramthanga chuan Mizoram RTI Online chu a tlangzarh.

Mizoram RTI Online hi Right to Information (RTI) hmanga thil zawhfiah duh nei tuten Office pana an kal ngai kher tawh lova mahni awmhmun atanga Smartphone emaw, Computer hmanga dilna an siam theihna tura ruahman a ni a, Mizoram RTI Online hi website (https://rti.mizoram.gov.in/) ah kalin emaw, Mobile Phone app Playstore leh App Store atangin Android leh Apple device hmangtute tan a download a hman theih a ni. RTI Online-a dilna (application) thehlut duh, Smart Phone emaw, Internet Connection nei remchang lo te tan Mizoram khaw hrang hrangah Common Service Centres leh Rural Information Kiosks 800-te kaltlangin a in tanpui theih dawn a. Dilna hi a chhuizui (track) theih dawn bawk a ni. Fee chawi ngai pawh awlsam takin Online a pek mai theih tawh dawn a. Department/Office tan pawh RTI dilna bo te a awm tawh dawnlo in, RTI thehluh ni atanga chhan hun chung pawh System in a monitor vek tawh dawn a ni.

Assembly Annexe Conference Hall-a Mizoram RTI Online tlangzarhna hunah hian Chief Minister Zoramthanga chuan RTI Online tlangzarh theih a ni ta chu lawmawm a tih thu sawiin, Mizoram mipuiin tangkai taka an hman a beisei thu a sawi a. RTI chu ram tan leh khawtlang tana tangkaia hmang a, thudik hailanna hmanrua a nih tur hu sawiin, a tha lo lam a hman erawh a fuhloh thu a sawi. Chief Minister chuan khawvel thiamna in hma sawn nasa in, a bik takin technology lama hmasawnna chuan khawvel pum dengchhuakin, ram lian ber leh ram te berte pawh hnai taka a thlunzawm dan a sawi a. Chu hmasawnna chu tangkaia hman thiam a, kan nun a lo awlsam mai bakah mimal leh khawtlang nunin hma a sawn theihna tura hman thiam tha a tih thu a sawi a ni.

Mizoram RTI Online tlangzarhna hunah hian Mizoram Information Commission-a Chief Information Commissioner Lalnunmawia Chuaungo IAS (Rtd.) chuan kalkhawmte lawmna thu sawiin, RTI chu sawrkar langtlang siamna tur hmanraw pawimawh tak a nih thu leh RTI Online hian sawrkar langtlang (transparent) leh mawhphurhna hlen tha (accountable) tak a siam belhchhah tur thu a sawi a ni.

He hunah hian Information & Communication Technology-a Chief Informatics Officer Dr. Lalthlamuana chuan RTI Online software chu MSeGS (Mizoram State e-Governance Society) in a thlawna an siam a nih thu sawiin, ISO certified a nih thu a sawi a. State Data Centre-ah host in, payment gateway hman ni bawkin, Office/Department te’n Treasury-a challan an buaipui a ngaih tawh loh tur thu a sawi bawk.