Governor in Chite lui tana hmalakna a sawipui

Mizoram Governor Hari Babu Kambhampati chuan Save Chite Lui Coordination Committee (SCLCC) hruaitute chu nimin khan kawmin Chite Lui tana hmalakna kal mekte an sawiho bakah Save Chite Lui Action Plan Phase-II hnuaia hmachhawp hrang hrangte an sawiho.

Tunhnaia India Prime Minister Narendra Modi-a’n Maan Ki Baat-a a thusawi bawhzuiin Governor hian Save Chite Lui Coordination Committee (SCLCC) hruaitute hi Raj Bhavan-ah kawmin Chite Lui-a bawlhhlawh lut tam ber plastic atanga thilsiam (plastic wastes) tihtawp a hmalak a pawimawh thu a sawi a, SCLCC hruaituten Chite lui tifaia hma an lak tawhna hrang hrangte chu tha a tih thu sawiin, India sawrkarin a kalpui mek Swachh Bharat an zawm tha hle tih a sawi a. Mipui-ah Awareness Campaign bakah luidung-ah a theihna hmun apiangah thingphun tam tura hmalak nise tiin thurawn a pe a, Garbage net pawh a tul a nih chuan hmang turin leh hun bi nei a hnatlang koh ni se, sikul zirlaiah Environment chungchang inzirtirna uar lehzualin kalpui nise a ti bawk a ni.

He hunah hian Chite lui-a bawlhhlawh lut zingah za zela sawmriat (80%) vel zet chu plastic atanga thilsiam hman hnu (plastic wastes) a nih thu leh vawi engemawzat tihfai a ni tawh anih thu ngaihthlak a ni a. Aizawl khawpui hnawmhnawk, he lui-a lut zinga langsar ber chu ‘plastic hman hnu’ an ni tih tarlan a ni a. Chungte chu chharkhawm ni fo thin mah se a thehthang zuina tur leh thehthang zui dan turah a tifaitute pawhin vawi duai lo harsatna an lo tawh thu te tarlan a ni.

Sawrkar laipui-a Ministry of Environment, Forest & Climate Change Dan siam, Plastic Waste Management Rules 2016 chuan plastic atanga thilsiam hman hnute hi tawng pawng thehthang mai lovin tangkai zawka hmanna dap tura a tih angin Chite lui-a plastic hnawmhnawk atanga PWD te nena tangkawpa siam; Reiek Plastic Road chu Powepoint hmangin thlirho a ni bawk.