COVID-19 dinhmun thlirho

Mizoram-a COVID-19 hri leng mek dinhmun thlirhona chu nimin khan Health Minister Dr. R. Lalthangliana hovin Aizawl-a SAD Conference Hall-ah neih a ni.

He thutkhawm ah hian tunhnaia Mizorama COVID-19 hri kai an pung chak thar leh chu ngaihthah chi a nih loh thu tarlan niin, hun kal tawha COVID-19 hri hluar dan an zirchiannaah India ram hmunpui (Maharashtra, Delhi etc.,) lama hri kai an pun nasat (peak) atanga chhuta thla khat leh thla hnih inkarah Mizoram-ah an dinhmun ang kan thleng ve ziah thin a, tunah hian India ram hmunpui lamah a hluar nasat leh tan mek avangin leh kan hun tawng tawh atanga chhutin tun hun hi kan lo inven lawkna hun remchang ber a ni tih tarlan a ni a. Mipuite chu theihtawp chhuaha fimkhur thar leh tura ngenin, hun reilote chhung kan fimkhur theih chuan kan fihlim thuai thei zawk dawn tih tarlan a ni.

COVID-19 hri laka invenna pawimawh ber pakhat COVID Appropriate Behaviour (CAB) uluk taka zawm thar leh a pawimawh thu tarlan niin, a bik takin chhiatni/thatni leh mipui pun-khawmna hmun Pathian biak inkhawmna, zirna In leh vantlang huap mipui intawhkhawmna hmunah te CAB, a bik takin mask vuah leh midang hlata awm zawm that a tul thar thu sawilan a ni a, CAB zawm a pawimawhzia inzirtir thar turin Kohhran leh tlawmngai pawlte ngen leh nise an ti bawk.

Integrated Disease Surveillance Prog-ramme (IDSP) report atanga a lan danin thla kalta June, 2022-ah khan COVID-19 hri kai thar mi 771 an awm a, hri kai hmuhchhuah tam ber ni chu June ni 8 kha niin hri kai thar mi 64 hmuhchhuah an ni. May thla khan sample 9343 test niin hri kai 839 (8.98%) hmuhchhuah an ni a, June thla khan sample test 7092 zingah positive 771 (10.87%) hmuhchhuah an ni. June thla kar hnuhnung ber (23 - 30) khan sample 1743 test niin positive 301 (17.27%) hmuhchhuah an ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar