NHM-a thawk te tuamdam theilo pawi tih thu sawi

ZPM Leader Lalduhoma chuan National Health Mission (NHM) hnuaia thawk nuar mek te sawrkar in a tuam dam thei lo chu pawi an tih thu a sawi.

NHM hnuaia thawk ten sawrkar laka an thilphut nawr nana lungawiloh an lantir mek chungchangah ZPM Leader hian nimin khan thuchhuah siamin NHM hnuaia hnathawk hi mi 2000 chuang an awm mek thu leh heng mite hi Central sawrkarin kan harsatna te phuhruk tura min chhawr sak niin kumkhuaa Central sawrkar ring tur kan nih loh thu leh zawi zawia State sawrkar kuta awm tur an ni tih a sawi a. India rama State zawng zawng tih theih deuhthaw hian an regularise tawh nia sawiin, “Kum tam tak chhung Mizo-ram-ah kalpui a ni tawh chung hian mi pakhat pawh an la regularise thei lo a ni,” a ti.

Lalduhoma chuan Health Department hnuaia NHM-ah hian thawktu hi 60% vel an awm thu leh tunah hian 60% chu an chawl ta vek nia sawiin, “Heng ho tel lo hian damlo enkawlna a kal mumal thei lova. He thil hi thleng lo tur hian sawrkar hian a tih dan a ngaihtuah a ngai a ni,” a ti a. Chutih lai mek chuan sawrkar in vau zuiin banah te a vau zui chu hriatthiam harsa an tih thu sawiin, “Mi in kum tam tak he hna hi an lo thawk tawh a, COVID-19 hripui len lai pawhin hrileng karah an nunna dahkhamin mipui damlo te min enkawl a ni,” a ti.

ZPM Leader chuan NHM hnuaia thawk nuar mek te kan sawrkar in a tuam dam thei lo chu pawi an tih thu sawiin, “Damlo tam takin nunna hlu tak an chan phah mai ang tih kan hlau a, heng kan unau nuar mekte hi kan lainat a, an harsatna te a rang thei ang ber a sukiang tûrin sawrkar kan phut a ni,” a ti a, sawrkar chu a duhna lam, Contract inpek ah te chuan a chak em em thu leh tuna lungawi lo te hi damlo enkawlna thil a nih avangin sawrkar chu an damdawi pe vat tura an phut thu a sawi bawk a ni.