Hri kai chhunga Quarantine hranpa tul lo; Zirna In khar pawh tul rih lo ah ngai

Mizoram-a COVID-19 hri kai hmuhchhuah te chu Omicron variant a nih tlangpui tawh avangin hri kai chhungte quarantine hranpa tul lovin zirna In pawh khar a tul rihlo ah ngaih a ni.

Nimin khan Health Minister Dr. R. Lalthangliana hovin SAD Conference Hall-ah Mizoram a COVID-19 hripui dinhmun thlirhona neih a ni a, he hunah hian hri kai tharte chu an natna a serious a nih loh chuan Home Isolation (mahni In lama inenkawl) uar a that thu sawi niin, Omicron variant a nih tlangpui tawh avangin hri kai chhungte Quarantine hranpa a tul lova, fimkhur taka Msk leh kutkawr nen hri kaite enkawl a him tih sawi a nih bakah, CAB tha taka vawn a pawimawh a, Contact Tracing leh Exit Test a tul lo tih sawilan a ni bawk a. Hri kai enkawl mekte chu uluk taka vil-a an natna a zual deuh erawh chuan a rang thei ang bera damdawi In panpui emaw, in report emaw a tul thu sawi a ni bawk. Hei bakah hian Sawrkar leh Private damdawi In hrang hrangah te Sample Test theih a nih bakah awlsam taka pan theih turin kiosk leh mega kiosk siam thar leh a tul thu tarlan a ni a, Sample Test kit tun dinhmunah a thlaphanawm loh thu sawi niin COVID-19 dona hmanraw chi hrang hrang pawh stock a awm that thu tarlan a ni.

Kumin March ni 21-a in kaihhruaina (SOP) tihchhuah, tuna hman mek chungchanga State Level Expert Team on Covid-19 Management (SLETOCOM) rawtna siamte he hunah hian thlirho niin, mipuite tana phurrit lo leh eizawnna nghawng nasa lo thei ang bera inkaihhruaina siam a tul thu an sawi a. Hri kai inringhlel te tan a rang thei ang bera Sample test a pawimawh thu sawilan niin, natna langchhuak (symptom nei) te pawh an natna a lanchhuah veleh a rang thei ang bera in test thin turin an ngen a, mahni a sample in test (self test) te pawh IDSP hnenah emaw, anmahni bialtu Health Department hotute hnenah in report thin turin an ngen a ni.

COVID-19 vaccine lak a pawimawh thu mipui ten hre thar leh se an duh thu tarlan ni bawkin, a bik takin Precautionary Dose lak hun tawhte leh 2nd Dose lak hun tawh ten lak ngei ngei a tul thu tarlan a ni a, Private Hospital-ah chauh Precautionary Dose lak theih tia sawrkar laipui thupek chu tihdanglam niin, India ramin zalenna a hmuh kum 75-na denchhenin Vawiin, July ni 15, 2022 atanga chhiara ni 75 chhung chu thlawnin sawrkar Vaccination Centre-ah pekchhuah a nih tur thu leh 2nd dose lak hnu thla 6-ah a lak theih a nih tawh thu tarlan a ni bawk.