Johnson College-a zirlai thar lawmna leh zirlai chhuak tur thlahna H&TE Minister in a hmanpui

Higher & Technical Education Minister Dr. R. Lalthangliana chuan Johnson College in zirlai thar an lawmluhna leh zirlai chhuak tur te thlahna hun nimin-a an buatsaih chu khuallian niin a hmanpui.

Aizawl Vanapa Hall-a he hun hmanna ah hian Dr. R. Lalthangliana chuan Mizoram-a kilkhawr leh thingtlang leh chhungkaw dinhmun pan leh harsa atanga lehkha zir tura khawpui lo kal te pawh, an tumruh leh an taimak chuan dinhmun pawimawh tak an chelh theih tih sawiin, eng chhungkua atang pawhin hlawhtlinna a neih theih thu leh chhungkaw eizawnna lamah harsatna kan lo nei a nih pawhin min pawt hniamtu ni lo a, tumruhna min petu a hmang turin zirlai kalkhawm te a fuih a. Khawvel thlirdan thiam tur leh huphurh zawnga en lo a, midang tih theih chu Mizo ten an ti ve ngei thei tura inngaiin khawvel chu chhuk en lova, a khamphei zawnga en a, chu chu chona lian taka a nei turin zirlaite chu a chah a ni. Minister hian Johnson College in hma a sawn chak nia a hmuh thu sawiin, College 28 zinga result nei tha ber pawl, 95% pass percentage neihna College an ni chu a lawmpui thu a sawi bawk.

Govt. Johnson College-ah hian zirlai mi 1100 vel leh Department 6 an awm a, Teaching Faculty 32 awmin, Non-Teaching Staff 13 an awm mek a. Kum 1993 a din niin, a tirah Private College niin, kum 2002 khan Deficit-ah hlankai a ni a; kum 2007 khan Provincialised a ni.