NHM hnuaia thawktute nawrh tum pawi tih thu sawi

Mizoram sawrkar-a Health & Family Welfare Department chuan National Health Mission Employees Union, Mizoram (NEUM) ten nawrh kaltlangpui an tum chu pawi an ti takzet tih an sawi.

Hemi chungchanga Health Department thuchhuah chuan NEUM ten July 11-13, 2022 chhunga lungawi lohna entirna atana Mass Casual Leave lak an tum thu chanchinbu kaltlanga an hre ta mai chu pawi an tih thu tarlangin, NHM Employees-te harsatna hi kum 2019 atang daih tawh khan Health & Family Welfare Department pawhin hriatpui tawhin Sawrkar-ah pawh an harsatna hi a thlen sak thin tih an tarlang a. Sawrkar pawhin ngai pawimawhin NHM Employees te leh Department hrang hranga CSS/EAP hnuaia thawktute dinhmun zirchiangtu tur Committee dinin, Study Report hi Sawrkar ah thehluh tawh niin uluk taka zirchianga ngaihtuah mek a ni tih an tarlang a ni.

NHM Employees-te thil ngiat Service Regularization chungchangah NHM hnuaiah hian thawktu hrang hrang mi 2000 chuang an awm mek thu leh anmahni ang tho a CSS/EAP hnuaia thawk Department hrang hrangah mi thahnem tak an awm mek bawk avangin ngun taka ngaihtuah ngai thil niin vawi leh khat a tih puitlin mai theih chi a ni lo tih an tarlang a. Amaherawh chu an dinhmun te zirchiangtu tur sawrkar-in Committee a dinte chuan ngawrh takin hma lain an zirchianna report hi ngaihchan mek a ni tih an thuchhuah ah chuan an tarlang a. Hlawh chungchang ah NHM a thawk te hi CSS atanga pek niin Health & Family Welfare Department bik chu IFMIS lamah mapping felhlel a awm avangin Treasury-ah bill reng reng submit theih a nih loh thu leh hemi avang hian IFMIS hmang lo tura dilna Finance Department-ah dilin, IFMIS exemption hi June 21, 2022-ah phalna dawn a ni tih an tarlang a. He lehkha hi hmuh a nih veleh hma la nghalin June 24, 2022-ah Treasury Office-ah submit nghal a nih thu leh Rs. 8,04,27,000/- chu June 27-ah chhuak nghalin, Rs. 3,86,73,000/- erawh chu Treasury office khawlin a chhiat hnan avangin July 6, 2022 ah chhuahtir a ni tih pawh an tarlang a. Heng pawisa te hi April leh May thla hlawh niin sem chhuah nghal vek a nih thu leh June thla atanga an hlawh tur pawh hi a hun taka pek an nih theih nan buaipui mek a ni tih an tarlang bawk.

July 8, 2022 tlai-a NEUM hruaitute nen thutkhawm an neih ah sawkar-in an dinhmunte hria a hma a lak mek lai a nih avang leh Study Group report pawh ngawrh taka sawrkar-in a ngaihtuah mek lai a nih avang leh Department pawhin report hi eng ang nge a nih dawn a la hriat bik loh avanga Mass Casual Leave lak an tum thulh tura ngen an ni chunga nawrh kaltlangpui an tum chu pawi an tih thu an tarlang bawk a ni.

Comments

Popular News (Last 30 Days)

Vawiin-ah HSSLC Exam result