Dan lova sumdawnna kalpuitute thurualpuitu ah kan sawrkar hi kan ngai - HCDC

Hachhek Constituency Development Committee (HCDC) chuan dan lova Foreign Kuhva Mizoram a lolut thin chungchang ah sawrkar chu Dan lova sumdawnna kalpuitute thurualpuitu ah an ngai tih an sawi.

Nimin-a thuchhuah aan siamah Hachhek Constituency Development Committee (HCDC) chuan Hachhek Bial Kuhva Chingtu Pawl (HBKCP) ten June 6, 2022-a Chief Minister Zoramthanga hnenah dan lova Foreign Kuhva Mizoram a lolut thin titawp tur leh June thla chhung ngei a dan lova Kuhva sumdawnna kalpuitute man chhuak tur leh an phu tawk hremna pe tura ngenna an lo thlen tawh chu an hriatpui thu leh, Mizoram Sawrkar in hma a lak ngei pawh an rin laia tun thlenga dan lova Kuhva sumdawnna kalpui zel a la ni hi hriatthiam har an ti hle tih an sawi a. Hetianga Sawrkar hmalakna an ngaihchan reng lai hian June 28, 2022 khan HBKCP te chuan Foreign Kuhva bag 285 lai mai manin July 7, 2020 khan Bag 300 ngawt an man leh bawk tih an sawi a, “Dan lova sumdawnna kalpuitute thurualpuitu ah HCDC chuan kan sawrkar hi kan ngai a, kan sawrkar hian dan lova sumdawnna kalpuitute hi a thurualpui lo a nih chuan he dan lova sumdawnna kalpuitute leh an thurualpui te zawng zawng hi a rang thei ang ber a manchhuak a, an phu tawk hremna pe ngei turin HCDC chuan sawrkar kan ngen tak meuh meuh,” tiin an bial chhung chu dan lova kuhva tawlhna kawnga hman an phal lo tih an sawi bawk.

Hetihlai hian ZPM Party pawhin nimin khan thuchhuah siamin Hachhek Bial Kuhva Chingtu Pawl (HBKCP), Hachhek Joint VC, Taitesena Group YMA, Langkaih Group YMA leh mi thahnemngai ten theihtawpin dan lova Kuhva tawlhruk tihtawp a nih theih nana sawrkar hruaitu lu ber Chief Minister thlenga hmuin hma an lo lak tawh thu leh heng hmalakna te hian Vawiin thlengin awmzia a nei lo tih tarlangin, “Kan sawrkar hrawn mek hian kuthnathawktute a ngaihpawimawh lohzia a tarlang chiang hleah ZPM chuan a ngai,” an ti a, Tualchhung kuthnathawktute hmakhua aia dan lova thiltitute hmakhua ngai zawk sawrkar chu an dem takzet tih an sawi a. “Kan sawrkar hrawn mek hnuaiah hian Mizoram chu Dan lova thilti thinte nuam ti taka tuallennaah a chang ta ringawt mai hi ZPM chuan hriatthiam har a ti a. Hnam ang pawhin a mualphothlak a, a zahthlak a, a rilru natthlak takzet a ni,” an ti bawk.