NH. 54 Keitum leh Bungtlang inkar siam meka leivung paih dan a hmunah enfiah leh a ni

Serchhip District Level Monitoring Committee on Implementation of JICA on National Highway-54 chuan Serchhip District chhunga National Highway-54 laihzauh leh siamthat hna thawh meka leivung paih dan enfiah hna chu nimin khan chhunzawmin Serchhip chhimlam Keitum atanga Bungtlang thlenga leivung paihna hmunhma te an tlawh.


Serchhip District Level Monitoring Committee on Implementation of JICA on National Highway-54 te hian June 28, 2022 khan Serchhip District chhunga NH. 54 laihzauh leh siamthat hna thawh meka leivung paih dan hi Khumtung khua atanga tanin an lo enfiah tawh a, hemi tum hian Serchhip leh Keitum inkar, Dawngzawl thleng enfiah niin hemi bak hi nimin khan enfiah leh a ni a. Keitum atanga chhimlam Serchhip District chin zawng hi M/s Bhartia Infra Projects Ltd. chuan thawkin hmun hrang hranga leivung paihna hmun chu enfiah niin, an leivung paihin mipuite tana harsatna a siam sak nia an sawi hmunte, leivung paihna hmun khat liam nasa tawh lutuk dawlzawl belh dan turte, a hmun ruata leivung paih lova a remchang laia an paih tak mai na hmun nia sawi te chu enfiah a ni a, leivung paihna hmun bakah hnathawktu ten leimin avanga leimin paihna atana an hman nia an sawi ah te chuan a mawng lamah leivung tawlh zel a awm lohna tura a dawlna siam tura tiin ruahmanna an siampui nghal zel a ni.


Monitoring Committee te hian helai hmuna hnathawktute chu leivung paihna hmun tura thlan ah chauh leivung hi paih ngei thin tura hrilhin, leivung paihna hmun khatliam tawh siamthat nana a dawlna siam tura tihte chu thla hnih (2) chhunga lo thawk zo turin an hrilh a, hetih chhung hian lei laih hna lo thawk tawh rih lo turin an hrilh bawk.

Helai hmuna hnathawktu Contractor te chuan ruahtui tlak tam laia Gabion Retaining Wall siam chu a harsa deuhva an rin thu sawiin, hna kallai an chawlhsan mai a remchan loh dan te an sawi a, tun hnuah chuan nasa lehzuala environment veng chungin hna thawh an lo tum tawh tur thu leh hmalakna tur an kawhhmuh apiangte tha taka lo bawhzui an tum tur thu an sawi a ni.


Nimin a helai hmun enfiahna a kal te hi SDO (Sadar) Lalzikpuii chuan hovin Member Secretary leh Thenzawl DFO Lalbiakchama Chawngthu bakah Mizoram Pollution Control Board aiawh, Information & Public Relations Department aiawh, Sub-Hqrs. YMA leh NHIDCL bakah Contractors hote an tel a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man