Auto Rickshaw-ah ‘Fare Meter’ vuah vek tum

Mizoram-a Auto Rickshaw hrang hrangah kumin chhungin ‘Fare Meter’ vuah vek tum niin hemi atan hian thupek tihchhuah a ni tawh.

State Transport Authority (STA), Mizoram-a Chairman chuan tun thla ni 7 khan hemi chungchangah hian thupek tichhhuakin sawrkar pawmpui rate anga mipui ten Auto Rickshaw an hman theihna atan State Transport Authority, Mizoram chuan Mizoram chhunga Auto Rickshaw zawng zawngah ‘Fare Meter’ vuah nise tia rel a nih thu leh hemi chungchanga STA thurel chu sawrkar pawhin pawmpuiin Fare Meter vuah tura Order chhuah, July 7, 2022 atanga Auto Rickshaw thar lei reng reng te chuan Fare Meter hi vuah nghal vek tur a nih thu leh vuah lo tan Registration phal sak tawh loh tur a nih thu a tarlang a. Hei bakah hian Auto Rickshaw service lai, Register fel tawh te chuan Order chhuah (July 7, 2022) atanga thla ruk (6) chhungin Fare Meter an vuah vek tur a ni tih tarlangin, huntiam chhunga tifel hman lo te chu Fitness Certificate pek loh tur a nih thu a tarlang a ni. Hei bakah hian Fare Meter-ah hian Standards of Weights & Measures, Govt. of India in a approve chauh hman tur a nih thu leh sawrkar in a approve rate dinglai, KM khat-ah Rs. 30/- zel leh a bak KM khat-ah Rs. 20/- angin meter hi set tur a ni tih a tarlang a, hei hi a dik leh dik loh MVI ten an enfiah thin dawn a, a dik te chu khawih danglam theihloh tura Seal zel an ni dawn a ni.