Health Minister hovin Mizoram District tin DC, CMO leh DIPRO ten hri leng chungchang an sawiho

COVID-19 hri leng hluar thar leh mekah District tinah COVID-19 hri kai enkawl ngai zual te enkawlna tur, Dedicated COVID Health Centre (DCHC) tinung thar leh tura ruahman a ni a, hri kai tharte chu an natna a serious a nih loh chuan Home Isolation (mahni In lama inenkawl) uar a that thu Health Minister hova Meeting-ah sawilan a ni bawk.

Nimin chawhnu khan Health Minister Dr. R. Lalthangliana hovin District tina Deputy Commissioner, Chief Medical Officer (CMO) te leh District Information & Public Relations Officer (DIPRO) te chuan an bial chhung theuha COVID-19 dinhmun sawihoin Virtual Meeting an nei a, he hunah hian Health Minister Dr. R. Lalthangliana chuan COVID-19 dona kawnga hmalakna chi hrang hrang sawrkarin a ruahman thin ah District tina Bawrhsap te leh DIPRO ten hripui dona kawnga theihtawp an chhuah thin avangin lawmthu a sawi a. Sawrkar laipuiin India ram zalenna kum 75 tlin denchhenin nimin, 15th July 2022 atangin kum 18-59 inkar te chu a thlawna Precaution dose pek runpui – ‘Covid Vaccine Amrit Mahotsava’ kalpui tur a nih thu puangin,nimin atanga chhiara ni 75 chhung (30th September, 2022) a huam dawn tih a sawi a ni.

Health Minister chuan India sawrkarin vaccine dose thumna- Precaution Dose hi a ngaipawimawh em em tih sawiin, Healthcare Workers, Frontline Workers leh kum 60 leh a chunglam tan chuan Sawrkar Vaccination Centre-ah a thlawn a lak theih tih a sawi a, hei hi nimin atangin kum 18-59 inkar an rawn huam tir bakah a duh tan Precaution dose hi Private damdawi In-ah man chawia lak theih turin ruahman a ni tih a sawi bawk. Precaution dose hi 2nd dose la tawhte tan 2nd dose an lak atanga thla 6 a liam hnuah lak theih tih sawiin, kum 18 tling tawh Precaution Dose la thei zawng zawngte la vek turin a ngen a, kum 12 chunglam vaccine la la lo te pawhin la vek turin a ngen bawk a, hemi tur hian District tina DC te, CMO te, District Immunization Officer- te hma lo la vek turin a ngen bawk a ni.

He thutkhawm ah hian hri kai tharte chu an natna a serious a nih loh chuan Home Isolation (mahni In lama inenkawl) uar a that thu sawi niin, hri kai chhungte quarantine hranpa a tul lova, khawsak phung pangngai an zawm theih thu leh midang zinga an awmin fimkhur taka CAB an zawm uluk a tul thu erawh tarlan a ni.

Hri kaite chu fimkhur taka Mask leh kutkawr nen enkawl a him tih sawi a nih bakah, Toilet hrang hman tir a tul tawh loh thute, an nat atanga ni 5 chhung bak inkhung a ngaih loh thu te sawi a ni a, an damthat hnuah erawh ni 10 chhung chu mask vuah a midang hlata fimkhur taka la awm rih a that thu sawi a ni a, CAB tha taka vawn a pawimawh a, Contact Tracing leh Exit Test a tul lo tih sawi a ni bawk.

Hri kai enkawl mekte chu uluk taka vil a an natna a zual deuh erawh chuan a rang thei ang bera damdawi In panpui emaw, in report emaw a tul thu sawi a ni a, hri kaite zingah Khawsik sang, SPO2 hniam (oxygen tlachham), kawthalo, thawhah te leh natna dang nei (Co-Morbid) an natna zualte chu a bik takin damdawi In pan vat tur a ni tih sawi a ni.

District tinah Dedicated COVID Health Centre (DCHC) tinung thar leh tura in chah a ni a, Damdawi In-a damlo enkawl laite hri kai an awm chuan enkawl chhunzawm tur leh anmahni dahna tur Ward/Wing hran siam turin an inchah bawk a ni.

Sample test-na hmun leh hmanrua te uluk taka buaipui tura inhrilh a ni a, damdawi In hrang hrang – District Hospital, CHC, UPHC,PHC leh Sub-Centre ah te sample test (RAgT) theih vek tura ruahmanna siam tura in hrilh a ni bawk a. Hri kai inringhlelte tan a rang thei ang bera sample test a pawimawh thu sawilan niin hri kai in report a pawimawh thu te pawh an sawilang bawk a ni.

Comments

Popular News (Last 30 Days)

LPG man bithliah thar