Mizoram Rajya Sabha MP in Mizoram kawngpui laihna leivung paih chungchang NHIDCL a sawipui

Mizoram Rajya Sabha MP K. Vanlalvena chuan niminpiah tlai khan NHIDC hotute chu New Delhi-a an Office-ah kawmin NHIDCL hnuaia Contractor leh Sub-Contractor ten Mizoram-a hna an thawh a leivung an paih chungchang a sawipui.

Rajya Sabha MP chuan NHIDCL Managing Director Chandal Kumar leh General Manager (Technical) Ashok Kumar Jha te kawmin Mizoram hmun hrang hrang ah thlur engemaw zat NHIDCL in Double Lane kawng an laih mek chu Mizoram hmasawnna leh Act East Policy atana tangkai tur a nih avangin NHIDCL hotute chungah lawmthu a sawi a. Hetih rual hian Mizoram hmun hrang hranga NHIDCL hnuaia Contractor leh Sub-Contractor ten an hnathawh Work Order in a phut anga hna thawk lova an tana awlsam tur ringawt ngaihtuaha leivung an paih chu Dan kalh a nih thu te, Mizoram chhunga Forest leh Environment te tihchhiat a nih nasat thu te, mi tam tak te thlai chinna leh lui te a tihchhiat nasat thu a thlen a ni.

Mizoram Rajya Sabha MP chuan Mizoram chhunga Double lane laih mek heng Seling to Tuipang te, Zemabawk to Champhai te, Lunglei to Tlabung te hi Mizoram sawrkar enkawlna hnuaia dah lova NHIDCL hnuaia hna te hi thawh an nih avangin uluk zawka enkawl turin NHIDCL hotute hi hmaichhanah a ngen a. Heng Contractorte hi a rang thei ang bera Control an tul thu leh a tul dan anga action lak a tul thu NHIDCL hotute hnenah hian thlen bawkin NHIDCL hnuaia kawnglaih leivung paihin ram a tihchhiat te thlalak leh video te NHIDCL hotute hi a hlan nghal bawk a ni.

Nikum October thlaa Union Minister of Road Transport & Highways changtu Nitin Gadkari hnena a lo thlen tawh, Mizoram chhim tawp kawngpui laih tur, Mara Autonomous District Council chhunga Kawlchaw to Lawngmasu emaw, Tuipang to Lawngmasu Double Lane Road lai tura ngenna a lo thlen tawh chungchang pawh Rajya Sabha MP K. Vanlalvena hian bawhzui nghalin, NHIDCL Managing Director Chandal Kumar chuan Kawlchaw to Lawngmasu hi PMGSY Road a awm avangin Zorinpui atanga Lawngmasu Double Lane Road siam belh zawk tura ruahman a nih thu leh chu chuan MP rawt anga Chhimtuipui lui kam, Lawng kal theihna Mizoram chhim tawp khua Lawngmasu a thlen dawn tho avanga hrethiam tura a duh thu leh a beisei thu a sawi a. Hemi atan hian DPR an peih tawh thu leh KM 28 a thui a nih tur thu te, kumin (2022) December atanga thawh tan theih a beisei thu te NHIDCL Managing Director chuan Mizoram Rajya Sabha MP K. Vanlalvena hi a lo hrilh bawk a ni.