Cheng nuai 225.58 hmanga sak PHC building hawng

Health & Family Welfare Department Minister Dr. R. Lalthangliana chuan nimin khan Bilkhawthlir-ah NABARD sum hmanga sak Primary Health Centre (PHC) a hawng.

Cheng nuai 225.58 hmang a sak PHC building thar hawnna ah hian Health Minister chuan Serlui Assembly Constituency chu Mizoram luhkapui a nih angin hriselna kawngah hmanrua leh thawktute pawh tihchangtlun zel a pawimawh thu leh thawktute pawhin mipui tan a rawngbawlna rilru puchunga hna an thawh a tul thu a sawi a. Serlui bial-a Health Sub-Centre awm zawng zawngte chu Health & Wellness Centre-ah hlan kai vek tawh a nih thu tarlangin, Vairengte Community Health Centre (CHC) pawh tih changtlun chhoh zel tum a nih thu a sawi.

Health Minister chuan Sawrkar in hmasawnna kalpui tura ruahmanna hrang hrang hmachhawp a neih te chu hripui leng avangte leh harsatna dang avangte in tum anga kalpui theih a nih loh thu sawiin, Health & Family Welfare Department hnuaia thawktu indaihlohna avanga harsatna sukiang tur a hnaruak lak tur a ruahman tam tak pawh beisei angin hnawhkhah a la nih loh thu a sawi a. Mipui hrisel zawk nan Health Department chu tha lehzual a thawmthat a nih mek thu sawiin, Aizawl Civil hospital-ah NICU chhiar telin khum 30 bawr vel leh ZMC-ah 70 bawr vel a awm tawh thu te leh ZMC-ah damlo enkawlna khum pawh 300 chuang a awm thu a sawi a, Cancer Hospital changtlung tak Zemabawk ah Japan International Cooperation Agency-te nen tangkawpin sak tum mek a nih thu a sawi bawk.

He hunah hian bialtu MLA Lalrinsanga Ralte chuan Serlui Assembly Bial chhunga Health Clinic hawn thar ah te mipui hriselna endik hna chak zawk a kalpui a nih theih nan MLA Fund hmangin mi 7 chhawr mek a nih thu a tarlang a ni.

Bilkhawthlir Primary Health Centre hi NABARD RIDF XXV hnuai a sum cheng nuai 225.58 hmanga sak a ni a, Zozam Engineering Construction & Consultancy, Aizawl sak niin September 9, 2020-a sak tan niin November 23, 2021 khan sak zawh a ni a, kawngan 235 Sqm leh chhawng khatna 235 Sqm a zau bakah a chung zawlah Room Sqm 40 a zau a awm bawk a ni.

He Building kawngan ah hian X-Ray Room, Casualty, Pharmacy, Laboratory, OPD, Office leh Operation Theatre a awm a, chhawng khatna ah hian Labour Room, Induction, Male & Female Ward leh Nursing Station-a awm bawk a. Bilkhawthlir PHC-ah hian X-Ray khawl bun tur a hmalak mek a ni a, a tul ang angte bawk zui mek niin July 2022 hian hman tan theih tura tihnun hman beisei a nih thu he hunah hian tarlan a ni bawk.