Mizoram-a Housing Complex hmasa ber tur ‘Federation Enclave’ Project tlangzarh a ni

Mizoram-a Housing Complex hmasa ber tur ‘Federation Enclave’ Project chu nimin khan Chief Minister Zoramthanga chuan Govt. Complex, Luangmual Aizawl-ah a tlangzarh a, Flat/Apartment man atanga 10% in booking a tih theih nghal a ni.

‘Federation Enclave’ Project hi Mizoram sawrkar hnuaia hnathawk intelkhawm, Federation of Mizoram Government Employees & Workers (FMGE&W) ten Mizoram sawrkar hnathawkte puala Housing Complex din a niin Flat/Apartment pawh 300 chuang awm thei tura ruahman a ni a, nimin-a tlangzarhna hunah hian Chief Minister chuan sawrkar hnathawk ten theihtawpa bul an tan ‘Federation Enclave’ chu a hlawhtlin ngei a duhsak thu sawiin, he hmalakna hi mi tam takin an tangkaipui hle tur thu a sawi a. Mamawhna avanga piang hmalakna chu a hmang tangkaitu turte mamawhna phuhru ngei tura buatsaih a pawimawh thu sawiin, ngaihtuahna leh hmathlir tha tak hman a pawimawh thu a sawi a. Hmun dangah, District dangah pawh hetiang ang Housing Complex siam duh an la awm zel theih thu sawiin, hmasawnna ruhrel tha din tur chuan Plan tha tak neih a pawimawh thu a sawi a. Eng hmalakna pawh ni se, Vision neih that a, kan tuma kan chian chuan engtikah emaw a hlawhtlin tur thu te, a tlachawp chin chiah ngaihtuah thin nih a hlauhawm thu a sawi bawk.

Blue Mountain Corporation in an kalpui ‘Federation Enclave’ a Flat/Apartment te hi Govt. of Mizoram hnuaia a ngheta thawk te tan lei theih a ni dawn a, Application Form-in a phut angin Proof of Employment Certificate an thil tel ngei tur a ni a, Mizoram Govt. Employees Housing Society-in a approve-te hnenah chauh Blue Mountain Company hian Flat/Apartment a allot dawn a ni.

Application Form te hi Rs. 2,000/- zela lei tur niin Non-Refundable a ni a. Flat/Apartment man atanga 10% pe-in Booking tih theih a ni a, Allotment an hmu lo a nih chuan Refund leh theih niin a bak 90% chu Bank hrang hrang SBI, MRB leh MC Apex Bank atang te-a Home Loan an lak hmangin pek theih a ni ang. Booking tih laia Full Payment ti nghal duh an awm a nih chuan Flat/Apartment man (Price) atanga 10% Discount pek an ni ang.