Mizoram atangin Agriculture Minister tel

National Conference of State Agriculture and Horticulture Ministers chu nimin leh niminpiah khan Bangalore-ah neih niin he hunah hian Mizoram atangin Agriculture Minister C. Lalrinsanga pawh a tel a ni.

Rampum huap Agriculture leh Horticulture Minister-te intawhkhawmna hi India rama a vawi khatna niin Union Agriculture Minister Narendra Singh Tomar chuan khuallian niin a hmanpui a. He Conference-ah hian Agriculture leh Horticulture-a India ramin hmasawnna bung thar chuankai a tum dan kawng hrang hrang chhawpchhuaha sawiho a ni.

National Conference-ah hian Mizoram atanga kal Agriculture Minister C. Lalrinsanga chuan Mizoram in Agriculture lama hmasawnna a neih te a report a. Loneitute harsatna leh Mizoram in Agriculture lama a mamawh hrang hrang te thlenin chung zingah chuan Central Scheme pangngaiin a tuam ngai loh Agriculture Link road te, Hill Terracing te, Central Scheme hrang hranga Cost norms te chu Hmarchhak State te tan a hniam lutuk thin avanga tihsan a ngaih chungchang te a thlen a. Mizoram-a District thar pathum-ah KVK din belh turin Central Sawrkar chu a ngen bawk a ni.

Agriculture Minister chuan Mizoram-a Oil Palm hmalakna chungchang te pawh sawilangin, loneitute tan Oil Palm Scheme thar chu Scheme tha tak a nih thu a sawi bawk a. Kum 2021-a National Good Governance Index-a Mizoram chu Hilly States Category-a Agriculture and Allied Sector-a titha ber (Pakhatna) kan nih angin Mizoram-ah hian Agriculture lama potential kan ngahzia leh Central Sawrkar tan pawha duhsak bik kan tulzia a sawi bawk.