Mipui chakkhai la turin Pik-Up Truck kal tum tawh lo

Hriangtlang khuaa Pik-Up Truck neitute chuan an khaw panna kawng laihtlang a nih hma chuan tun thla ni 18 atang khian mipui chakkhai la tura kal tawh loh an rel.
Serchhip District chhunga awm Hriangtlang khuaa Pik-Up Truck neitu, Hriangtlang Pik-Up Owners Association te hian an khaw panna kawng chu NH. 54 Serchhip by-pass road laih avangin thla li (4) chhung zet a chhiat tawh thu leh a Dawngzawl kaltlanga a helna kawng pawh kal theih loh khawpin a chhe tawh niin an sawi a, hei vang hian an khaw panna kawng hi laihtlang a nih hma chuan tun thla ni 18 atang khian mipui mamawh, Ration buhfai leh chakkhai la turin kal tawh loh an tum thu an sawi a, thuneitute chu a rang lama hma lak sak turin an ngen bawk.

Tarlan tawh angin Serchhip Sailiamkawn atanga Hriangtlang panna kawng hi kumin April ni 14 khan NH. 54. Serchhip by-pass laihna ko chhaklam min avangin kawng chhuat chu a bal a, he kawng thlakna atan hian by-pass atangin kawng thar lai turin kumin June 8 khan Serchhip DC hova Meeting-ah ruahmanna siam ni mah se tun thlengin kawng hi laih ala ni ta rih lo nia thudawn a ni.