ASF vangin Vawk 104 thi tawh

Serchhip District-ah kumin chhunga African Swine Fever (ASF) vanga Vawk thi chu 104 a tling tawh.

Nikum lamah ASF avanga Serchhip District-a Vawk vulhtu ten harsatna nasa tak an tawh hnuah kumin March thla tawp lam atang khan ASF vanga Vawk thi hi a awm belh leh a, nimin thleng khan Serchhip District chhunga khaw 4 chu ASF hri lenna ah hian puan ni tawhin ASF vanga Vawk thi tamna ber ni mek East Lungdar khua ah nimin khan Vawk thi pahnih a awm belh leh a, he khua ah hian kumin hian ASF vangin Vawk 53 lai a thi tawh a, Vawk 19 chu suat a ni tawh bawk. Hei bakah hian Sailulak-ah Vawk 33 thi tawhin 28 suat a ni tawh a, North Vanlaiphai-ah Vawk 14 thi tawhin 20 suat a ni tawh a, Bawktlang-ah Vawk 6 thi tawhin 25 suat a ni tawh bawk  ni. Tun dinhmunah East Lungdar tih loh khaw dang ah hi chuan Vawk thi hi a awm belh meuh tawh rih lo a, ASF avanga Vawk thi hi 104 ni tawhin Vawk 92 suat a ni tawh bawk a ni.

Hetihlai hian ASF hri lenna hmuna puan la ni lo khaw 9-ah Vawk 37 thi tawhin Vawk 91 suat a ni tawh bawk a, North Mualcheng-ah Vawk 28 thi tawhin 23 suat a ni tawh a, New Serchhip-ah Vawk 66 suat ni tawh bawkin a bak khaw dang ah Vawk thi leh suat tam tham a awm lo thung a ni.