Kumin ah Zu leh a kaihhnawih man tam tawh

Serchhip-a Excise & Narcotics Department chuan kumin-ah kum chanve chhungin Zu leh damdawi tam tham tak man tawhin heng kaihhnawih ah hian mihring pawh za chuang man an awm tawh bawk a ni.
Serchhip-a Excise & Narcotics Department thawktute hnen atanga thu kan dawn danin kumin January thla atanga kum chanve, June 30, 2022 thleng khan Serchhip-a Excise & Narcotics Department hian Rakzu litre 2763.6 zet man tawhin Zu bilhlai Tin 827 an man tawh bawk a, heng bakah hian State pawn atanga lakluh Sapzu (IMFL) pawh um puitling 312 man tawhin a chanve um pawh um khat an man bawk a, Cane Beer 88 zet an man tawh bawk a ni. Hemi hun chhung hian Zu siamna atana hman Bel pawh 81 an man tawh bawk a, lirthei LMV 6, Two Wheeler 2 leh HMV pakhat an man tawh a ni. Heng Zu leh a kaihhnawih an man te hi MLP Act hnuaiah thubuai siam sak thin niin thubuai 121 ziahluh niin mihring 104 man an ni bawk.

Kumin January atanga June thla tawp thleng khan Serchhip-a Excise & Narcotics Department hian Heroin No. 4 pawh gram 939.05 zet an man tawh bawk a, hei bakah hian Ganja pawh kg. 8 lai an man tawh a, heng kaihhnawih ah hian ND&PS Act hnuaiah thubuai 32 ziahluh niin mi 38 an man tawh bawk a ni.