Laldenga thih champha pualin hun hman a ni

Nimin July 7, 2022 kha MNF Founder President Laldenga (L) thih champha vawi 32-na niin Aizawl Treasury Square-a a Thlan-ah a puala hun hman niin Pangpar dah a ni bawk.

Nimin zinga Laldenga (L) Thlan-a a thihchampha puala hun hman ah hian MNF President leh Chief Minister Zoramthanga chuan, “Pu Laldenga hova bultan MNF chu kum 1966 atang tawh khan a ral leh mai ang, thisen chhuah hmang an ni, tiin politician-ten an sawi thin. Amaherawhchu, Mizoram-ah tualto party tlo lo tam tak karah MNF chuan kum 60 hmel a hmu thei ta a ni,” a ti.

He hunah hian Laldenga (L) nupui MNF Adviser Lalbiakdiki pawhin Laldenga chawimawia a awm chu lawmawm a tih thu sawiin, a thlan chunga chawimawina te chu Pu Denga pawh khan a beisei phak a rin ngai loh thu a sawi bawk.

Laldenga hi July 11, 1927-ah Lunglei Pukpui khuaah piangin kum 1944-ah British Indian Army a zawm a, kum 1959-ah Mizo National Famine Front chu a hova din niin, chu pawl chu October 22, 1961-ah Mizo National Front (MNF) tiin thlak a ni. Laldenga hi kum 1986 khan Mizoram sawrkar lailawk (interim)-ah Chief Minister niin kum 1987-a Mizoram State Assembly inthlan hmasa berah Sateek leh Aizawl North-II bial atanga thlantlin niin State nih hnua Mizoram Chief Minister hmasa ber a ni.

Laldenga hi kum 1990 khan Cancer a nih hriatchhuah niin Memorial Sloan Kettering Cancer Centre, USA-ah thla thum enkawl a nih hnuin Mizoram pana an haw kawng Ashford Hospital, London-ah July 7, 1990, India sana a tlai dar 2:30-ah a thi a. A ruang hi July 11, 1990 tlai dar 4:30-ah Tuirial Airfield-ah Helicopter-in phurh thlen niin July 13-ah vuiliam a ni a, Mizote zinga State Funeral-a vui awmchhun a la ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man