India President thlanna neih tura NDA Candidate Draupadi Murmu-i Mizoram-ah a rawn zin

Tun thla ni 18-a President thlanna neih tura BJP leh a thawhpui Party, NDA ten an Candidate Droupadi Murmu-i chu nimin khan lehlangin Mizoram-ah a rawn campaign a, MNF leh BJP MLA te leh an Party hruaitute kawmin Mizoram Governor pawh a kawm bawk a ni.

India President thlanna tun thla ni 18-a neih tura BJP leh a thawhpui National Democratic Alliance (NDA) Candidate Droupadi Murmu-i hian nimin khan lehlang-a Mizoram rawn tlawhin Lengpui Airpot-ah Special Flight hmangin a rawn tum a, Lengpui Airport-ah hian Chief Minister Zoramthanga hoin I&PR Minister leh Law Minister ten an lo hmuak a, Lengpui atang hian Aijal Club pan nghalin MNF MLA leh Mizoram BJP hruaitute hnen hun an hmang a, NDA Presidential Candidate chuan tun thla ni 18-a President thlanna lo awm turah amah thlawp turin Mizoram-a BJP leh MNF MLA te chu a sawm a. He hunah hian Chief Minister leh MNF President Zoramthanga, BJP National Spokesperson Sambit Patra leh Mizoram Pradesh BJP President Vanlalhmuaka te pawhin thu an sawi a ni.

Droupadi Murmu-i hi Union Cabinet Minister Sarbananda Sonowal, Minister of State Pratima Bhoumik, BJP National Spokesperson Sambit Patra leh Assam Minister Ashok Singhan ten an rawn tawiawm a, Aijal Club-a hun an hman zawh hnu hian Governor Dr. Hari Babu Kambhampati chu a chenna In, Raj Bhawan-ah tlawhin inkawmna an nei nghal a, he hunah hian Larsap hi Mizoram chanchin te zawtin Mizoram chu hmun nuam tak nia hmuh thu a sawi a, inkawmna an neih zawh hnu hian Lengpui atangin Guwahati an pan leh nghal a ni.

India President thlanna neih tur atan hian June 15, 2022 khan hriattirna tihchhuah ni tawhin hming pekluh hun a tawp hnuah inhnukdawk duh tan pawh inhnuhdawh theih hun a tawp tawh a, tun thla ni 18 khian Vote thlak tura ruahman niin he inthlanna ah hian Parliament In hnih-a Member (MP) te bakah State 28 leh UT-a MLA ten Vote an thlak dawn a. Mizoram atang hian MLA 40 te bakah MP pahnih ten Vote an thlak thei dawn a, MNF hian MLA 28 leh MP pahnih neiin BJP in MLA pakhat an nei bawk a. He inthlanna a Vote thla te hi July 21, 2022 khian chhiar tura ruahman niin tuna President nilai Ramnath Kovind-a Term chu July ni 25, 2022-ah a tawp dawn a ni.

Tarlan tawh angin tun tuma President thlanna neih turah hian BJP leh an thawhpui, National Democratic Alliance (NDA) chuan Draupadi Murmu-i hi an Candidate a, amah hi Baidaposi, Odisha chhuak niin Jharkhand Governor hlui a ni a, eptu lam United Opposition chuan External Affairs Minister hlui Yashwant Sinha chu an candidate ve thung a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar