Geographical Indication nei Mizo Puan thlirhona nei

Mizo Puan zinga panga (5) Geographical Indication (G.I.) nei te tah dan tur (Technical Specification), a hman dan leh hman khapna (Use & Misuse) chungchang thlirhona chu nimin khan neih a ni.

He thlirhona Secretariat Conference Hall-a neih hi Art & Culture Department chuan an Secretary hovin an nei a, June 10, 2022-a Mizoram sawrkar in Notification a lo chhuah tawh angin, hemi bawhzui dan tur hi khunkhan takin sawihona neih a ni a. Heng Geographical Indication nei Puan te hi Puanchei, Pawndum, Ngotekherh, Hmaram leh Tawlhlohpuan te niin heng Puan te hi sawrkar-in Puantahtu a pawmpui (Authorized User) te tan chauh siam leh tah theih a ni anga, Authorized User-a in register duh te tan Art & Culture Department Office, Chanmari, Aizawl-ah Office hun chhungin zawhfiah theih a ni ang.

Sawrkar thuchhuah Geographical Indication puan tah dan tur leh hman dan leh hman khapna (Use & Misuse) te hi Art & Culture Department Website mizoculture.mizoram.gov.in-ah download theiha dah a ni bawk.

Kumin June 10-a Mizoram sawrkar in heng Puan panga (5) te chungchanga Notification a tihchhuah ah hian heng Puan hrang hrangte tah dan tur leh hman dan tur kimchang pawh tarlan a ni a, heng Puan Geographical Indication tag nei - Puanchei, Pawndum, Ngotekherh, Tawlhlohpuan leh Hmaram te hi a puan ngau ngau hi chuan a hmanna dik tak atan bak thil dangah hman phal a ni lo tih tarlan niin, heng Puan zethlan te hi thildangah hman khap a ni lova, amaherawh chu a zahawmna ti bawrhbang thei khawpa hman phal a ni lo tih pawh tarlan a ni a. Heng Puante hi a tah nilo, print chi hrang hrang hmanga siam phal a ni lo tih pawh tarlan a ni bawk.

Hei bakah hian Geographical Indication puan zethlan/design-te hi incheina danga kan hmang dawn anih pawhin Authorized User te tah ngei hman tur a nih thu leh a zethlan/design dik tak chauh hman tur a ni tih pawh tarlan a ni a, thawmhnaw dangah zeh tel anih pawhin a zahawmna ti bo thei zawng a hman loh tur a nih thu leh heng Puan te hi pi leh pu atanga kan rochun niin an zahawmna vawnhim hi kan mawhphurhna a ni tih pawh tarlan a ni bawk.

Geographical Indication Tag nei heng Puan hrang hrangte hi hman phalna leh phal lohna pawh tarchhuah a ni tawh bawk a, Dawhkan/Khum khuhna leh parda atan hman phal a nih loh bakah Stage, Lectern leh Bang chei nan pawh hman phal a ni lova, Pawndum tihloh Puan dang hi ruang khuh nan hman phal ni lovin Pawndum hi Pawndum hi hlim leh lawm ni ah leklam tur a ni lo tih tarlan a ni bawk.

Comments

Popular News (Last 30 Days)

LPG man bithliah thar