Kan thlahtu ten Mizoram tlangram chhengchhia an lo luah chu Pathian remruat a ni - Zoramthanga

MNF Party chuan nimin khan Aizawl-a Mizo Hnam Run-ah mi thar lawmluhna hun hmangin he hunah hian an President Zoramthanga chuan, “Kan thlahtu hmasaten Mizoram tlangram chhengchhia an lo luah chu Pathian remruat a ni,” a ti.

MNF Party in nimin-a mi thar lawmluhna hun an hman ah hian Zonet Cable TV-a News Editor nilai J. Malsawmzuala Vanchhawng chu lawmluh niin he hunah hian MNF President Zoramthanga chuan Hnam thuthlung nei Party-ah sengkhawm hna kalpui mek a nih thu a sawi a. MNF lungphum leh thuthlung bulthum sawiin, “Kan thlahtu hmasaten Mizoram tlangram chhengchhia an lo luah chu Pathian remruat a ni. Khawchhak atanga thlang tlain Bangladesh phai-ah lo tawp ta se, Muslim kan ni vek mai thei. Zoram ngawpui-ah tawp lovin Manipur leh Assam tawlh thleng se Buddhist leh Muslim kan ni vek ang,” a ti. Mizote chu chanchintha hril tura humhim tlat kan ni tih pawh sawiin, “Khawchhak Mongoloid leh khawthlang Aryan inang lo lutuk leh inpawm tawn lo karah Mizote chu a laiah - khawi lam lamah pawhin chanchintha hril turin min pawm. Asia ram huapin thlir ila chanchintha hril turin Mizoram ang an awm lo. Pathian in danglam taka a dahte kan ni a, hei hi kan lungphum - Pathian leh kan ram tan tih lo intanna a ni,” a ti.

Zoramthanga chuan, “MNF-in Independence a puan hma February ni 28, 1966 zan khan Assam Rifles kha la ta ila, tun hi kan thleng lo ang. Sum tam tak neiin Zoram kan awp ang, mahsela India thinrim nen kan inbei ang a, kan thi hnem ngawt ang. Tin, sum ngah avangin kan buai nasa hle ang. Pathian in a tawk tein min hruai zel zawk a. MNF-in harsatna a paltlang hi mimal anga kan tawrhna nasa viau mah se, Movement avanga kan tawrhna a nasa zawk,” a ti bawk.

Nimin-a MNF Party-a lawmluh tak J. Malsawmzuala Vanchhawng hi Zonet Cable TV a News Editor nilai niin Thenzawl khawchhuak a ni a, nakum-a Mizoram Assembly inthlanpui neih turah Serchhip Bial viltu tur nia thudawn a ni bawk. J. Malsawmzuala chuan, “Thangkhat lian zet, kum 20 chhung vel journalism khawvela hun ka lo hman ve tawh chhung hian kan phak tawkin ram kan vei ve a, politics hi mahni mihringpuite rawngbawlna pawimawh tak a ni a, Social Work a ni emaw, mipuite chawikanna hna a ni emaw, a tawpna chu politics tho tho hi a ni a. Tunah hian ram tana rawngbawlna zau zawk luhchilh ve tumin ka lo inbuatsaih ta a ni,” a ti.

Comments

Popular News (Last 30 Days)

Vawiin-ah HSSLC Exam result

LPG man bithliah thar