Flyover siam turin MoU ziak

Aizawl khawpui chhung Vaivakawn Junction-ah leh Bawngkawn Junction-a Flyover siam hna thawh tur atan nimin khan Mizoram sawrkar leh Telecommunications Consultants India (TCIL) chuan thawhhona thuthlung, Memorandum of Understanding (MoU) an ziak.

CM Conference Hall-a MoU ziahna hi Chief Minister Zoramthanga hriatpuina a neih niin Mizoram sawrkar aiawhin K. Lalthawmmawia, Secretary PWD leh TCIL aiawhin Rashk Siddiqui, Asst. General Manager te chuan an hming an ziak a ni.

PWD Engineer-in-Chief Er. Bowman sawi danin he thawhhona thuthlung ang hian Bawngkawn leh Vaivakawn Junction-a Flyover siam hna hi Telecommunications Consultants India Ltd.(TCIL) chuan Ddetailed Project Report (DPR) siam atanga sawrkar laipuia bawhzui leh hna thawh zawng zawng nen an tum tur thu a sawi a, Mizoram sawrkarin sum sen nei lovin, TCIL hlawh tur hi DPR atangin 4% an insiam sa tur thu te, sawrkar laipuiin he project atan sum lo sanction thei lo palh pawh ni se Mizoram sawrkarin chawi engmah a neih loh tur thu te a sawi bawk a, he Project pahnih atan hian reilote ah DPR peihfel beisei a ni tih a sawi bawk.

He hunah hian Adviser to CM (Technical) K. Lalsawmvela pawhin thu sawiin Project 2 atan hian Fesibility Study neiin pawm (approve) a ni tawh niin a sawi bawk a. “Kan State in kan tih aiin Telecommunications Consultants India Ltd. (TCIL) in an buaipui hian a awlsam zawk dawn a. Project hi thawh anih hunah Mizoram PWD ten enzui leh vilpui hna an thawk dawn a ni,” a ti bawk.