Hna pangngai lak theih hunah SEDP Teacher tawp dawn

Human Resources Development Board-a Vice Chairman leh MNF Adviser L. Thangmawia MLA chuan SEDP Teacher 771 rawih thar leh an ni tih sawiin, Hna pangngai anga lak a theih veleh SEDP Teacher hi a tawp leh ang tih a sawi.

Nimin a Aizawl Mizo Hnam Run-a Chhung Inkhawm neih ah L. Thangmawia hian he thu hi sawiin, Covid len hma khan High School zirtirtu 157 lakna tur tihfel a nih thu leh Covid-19 leng thut avangin inrenchemna (Austerity measures) kalpui niin hna lak theih a ni ta lo tih a sawi a, Zirtirtu indaihlohna a awm reng bawk si avangin SEDP Teacher lak an nih thu leh a hming chauhin lawmman pek an ni tih a sawi a. Tunhnaiah Primary leh Middle School-ah indaihloh zualpui awmna ah SEDP Teacher 771 rawih thar leh an ni tih sawiin, “Hna pangngai anga lak a theih veleh SEDP Teacher hi a tawp leh ang,” a ti a ni.

Human Resources Development Board Vice Chairman chuan MNF sawrkar tirh ah Thing-tlang khaw 400-ah tal Zirtirtu Quarters awm se tiin an rel thu leh Central-ah an dil vek tawh thu sawiin, Covid a lo hluar vangin File a mu rih niin a sawi a. SEDP Board 14 te chu Congress hunlaia Parliamentary Secretary ang a ni lo tih sawiin, “Board in kan hmalakna te hlawhtling se chuan Board enkawl nana senso let nga hi kan hmu tawh ang,” a ti bawk.

“Lehkhathiam kan duh a, saptawng kan uar lutukna lamah kan Hnam tawng kan thiam tha ta lo. Kan tu leh faten mahni hnam tawng an thiam meuh ta lo. Saptawng chauh ni lo hnam dang tawng hrim hrim Mizo tawng-a seng luh a ngai ta,” tiin Chutiang tithei tur thuneitu sang Mizo Language Development Board chu Chief Minister ruahmanna in din a lo ni ta tih a sawi a. “Hei hian ram leh hnam tan Mizo tawng hmasawn nan nasa takin hma an la thei dawn a ni,” a ti bawk.