ASF vanga Vawk thi za tling

Kumin ah Serchhip District-a ASF vanga Vawk thi chu za aiin a tam ta.

Nimin khan Serchhip District-ah ASF vanga Vawk thi 10 lai a awm belh leh a, heng Vawk thi te hi East Lungdar khuaa mi te vek niin an zinga 6 te hi thla thum (3) hnuailam an ni a,a dang 4 te hi thla 3 leh thla 8 inkar te an ni thung. Heti hian nimin thleng khan ASF vanga East Lungdar khuaa Vawk thi chu 48 a ni tawh a, Serchhip District-a ASF vanga Vawk thi zawng zawng pawh 101 a tling ta bawk a, Vawk suat belh awm lovin Vawk suat tawh zawng zawng chu 90 a ni.

ASF hri lenna hmun ni lo North Mual-cheng khua ah nimin khan Vawk thi 5 a awm belh leh a, he khua ah hian Vawk 26 lai thi tawhin Vawk 23 suat a ni tawh bawk a, he khua ah Vawk thi te Sample hi enfiah tura thawn mek a ni.