Serchhip Fire Station-ah thawktu an awm tlem; Kumdang aiin kumin ah kangmei chhuak a tlem

Thawktu mi 13 tal awmna tura ngaih Serchhip Fire Station-ah tun dinhmunah thawktu mi 7 an awm mek a, helai hmuna thawktute chuan vanduaina thlengin kangmei rapthlak chhuak palh awm se mualpho thut thei dinhmun ah an ding nia an in hriat thu an sawi.


Tunhnaia Serchhip Fire Station-a thawktu sawnchhuah chungchangah nimin khan Serchhip Fire Station chu LENKAWL chuan tlawhin an hnathawh dan leh tuna thawktute dinhmun tlangpui te helai hmuna thawktute chuan an sawi a. Serchhip-ah hian Fire Department hi Station puitling a awmin Station puitling hi Inspector Rank, Station Officer (SO) enkawl thin niin Sub-Station chu SSO in an enkawl thin thung a, an hnuaiah hian Leading Fireman (LFM) leh Fireman bakah Driver te an awm leh thin a ni.

Serchhip Fire Station-a thawktute chuan kum 2018 bawr vel kha chuan thawktu mi 11 vel an awm thin thu sawiin, kum 2018-ah Serchhip-a LFM pakhat leh Driver pakhat chu sawnchhuah niin thawktu mi 9 an awm zui a, kum 2020-ah Station Officer chu thlaktu awm lova sawnchhuah niin LFM pakhat chuan Incharge angin Station Officer mawhphurhna hi a la a, thawktu pawh mi 8 chauh awmin tunhnaiah thawktu pakhat chu Lunglei lamah sawnchhuah leh a ni a, tunah hian thawktu mi 7 awmin, heng te hi Station Incharge (LFM) pakhat, Fireman pali (4) leh Driver pahnih (2) te an ni.


Serchhip Fire Station-a thawktute chuan Station-ah hnathawktu awm tur zat bituk hi a awm chiah lo nia sawiin, amaherawh chu Training te an neih thinna ah hian kangthelh Motor pakhat ah LFM pakhat, Fireman 4 leh Driver pakhat, an vaiin mi 6 awm tur a ni tih an sawi a. Hemi ang hian kangthelh Motor pahnih enkawl tur hian thawktu mi 12 leh Station Officer mi pakhat awm tura ngaih ni mah se thawktu hi mi 7 chiah an awm a, Motor chungchang ah erawh harsatna an neih loh thu an sawi a ni.

Serchhip Fire Station-a thawktute chuan tun dinhmunah Fireman 2 leh Driver pakhat te chu chhun leh zan-ah an in duty chhawk thin thu leh tunhnaiah Fireman pakhat in chawlh a lak leh bawk si avangin hei pawh hi luahkhat thei dinhmun ah an ding rihlo tih an sawi a. Thawktu tlem te an awm avangin hun kal tawha vanduaina a thlen chang pawhin Duty lo te nen pawh an inpuih thin thu leh tunah chuan Motor pahnih hmanga chhuak tur pawhin an indaih meuh tawh lo tih an sawi a, hei vang hian vanduaina rapthlak thleng palh a awm hlauh a nih chuan mualpho mai thei dinhmun ah an ding tih sawiin, an dinhmun hi khawtlang mipuite pawhin hriatpui se an duh thu an sawi a ni.

Serchhip Fire Station-a thawktute chuan kumin kum chanve kan hman tawh ah vanneihthlak takin kangmei vanga harsatna liantham kan tawk lo tih sawiin, kangmei chhuak vanga In chhia a awm loh thu an sawi a, ram kang thelh turin tum thum an chhuak tawh thung tih sawiin, mipuite chu kangmei laka fimkhur zel turin an chah bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar