Grape rah lei tan leh mek

Champhai leh Hnahlan-a Grape chingtute grape tharchhuah chu tunlai hian leikhawl mek a ni.

Hnahlan Grape Growers Association chuan kumin hian Grape rah quintal 618 an lei tawh thu sawiin, kg. khat Rs. 60/- hisap zelin an lei a, an lei apiangte chu a sawrna khawl-ah her sawmin an sawr nghal zel a ni. Hnahlan-ah hian kum kalta khan Grape quintal 511 chu kg-ah Rs. 50/- hisapin leikhawl a ni a, heng te hi sawr fel vek a ni a, an hralhchhuak mumal thei lova, Grape tui sawrsa litre 30,000 chuang zet an nei sa a, kuminah hian quintal 800 vel lei tur a awm theih an beisei a ni.

Champhai Grape Growers' Society chuan nimin atang khan Grape rah an leikhawl tan bawk a, kg khat Rs. 60/- zel hisap in quintal 53 an leikhawl hman a, tun thla ni 20 khian an tharchhuah chu lei zawh hman tum niin sawr tan nghal a ni dawn a ni. Champhai-ah hian Grape tui sawr sa litre 1,14,000 vel awmin um-a dah sa hralhchhuah loh thahnem tak ala awm bawk.