COVID-19 hri kai mi 58 hmuh belh leh an ni

Mizoram-ah COVID-19 hri kai hmuhchhuah an la pung zel a, niminpiah khan Mizoram-ah Sample 124 enfiah niin heng atang hian hri kai mi 58 zet hmuh an ni a, Sample enfiah atanga chhutin za zela 45.67 te chuan hri hi an kai a ni.

Niminpiah a Mizoram-a COVID-19 hri kai hmuhchhuah te hi Rapid Antigen Test hmanga Sample enfiah 124 atanga hmuh te vek an ni a, an zinga 33 te chu Aizawl District-a hri kai hmuh te niin Serchhip District-ah 20 hmuh an ni bawk a, Lunglei District-ah hri kai mi 4 leh Saitual District-ah mi pakhat hmuh an ni bawk. ZMC-a RT-PCR Laboratory-ah Sample enfiah pakhat leh TrueNat Laboratory-a Sample enfiah 2 atangin hri kai hmuhchhuah an awm lo thung a ni.

Nimin khan Mizoram-ah COVID-19 hri kai enkawl dam pawh District 5-ah mi 40 an awm belh ve leh a, heti hian nimin tlai dar 5:00 thleng khan Mizoram-a COVID-19 hri kai hmuhchhuah tawh chu mi 2,29,106 niin an zinga 2,28,143 te chu enkawl dam an ni tawh a, hei hi hri kai atanga za zela 99.58 niin hri kai enkawllai 260 an la awm a, hri kai zingah mi 703 boral tawhin hri kai enkawllai tamna ber Aizawl District-ah mi 157 enkawllai an la awm a ni.