Home Minister in Police fuih

Home Minister Lalchamliana chuan Mizo-ram Police chu invawng uluka discipline tha taka vawng tura chahin, taksa hrisel leh in fit taka awm reng tur an ni tih a sawi.

Mizoram Police in kum 50-na an hman mek lawmna kal zelah Home Minister Lalchamliana hian nimin khan PHQ Multipurpose Hall-ah ‘Mizoram Police 50th Anniversary (Golden Jubilee) Disc’ a sem a, hemi puala inkhawm neih ah Home Minister chuan he thu hi sawiin, mipuite rawngbawlsaka venghimtu an nihna kawnga an mawhphurhna pawimawh zia hre thar zel tur leh mahni infuihna atana hmang thin turin Police te chu a chah a, Social Media hman kawngah pawh fimkhur lehzual turin a chah bawk a ni.

Home Minister chuan kum 50 chhungin Mizoram Police-in hmasawnna nasa tak a neih thu pawh sawiin, Mizoram Police chu Mizorama chengte venghima thlamuantu an nih thinna chu a hlu a, mipuiten innghah nan leh thlamuantu atan an rin zel tura anmahni pawh tunlai thiamna leh boruak mila a tul anga inher rem zung zung thei tura inzir taima turin a chah a. COVID-19 hripui leng vanga sawrkarin inrenchemna (austerity measure) a kalpui avangin Mizoram Police tihchakna tur leh tihhmansawnna tura ruahmanna awm sa leh phalna hmuh vek tawhte pawh duh anga chakin a tihhlawhtlin theih rih lova, heti chung chung hian sawrkarin an dinhmun hriain a ngai pawimawh thin tih sawiin, theihtawp chhuaha hma lak chhunzawm zel a nih tur thu a sawi bawk.

Nimin-a Mizoram Police 50th Anniversary (Golden Jubilee) Disc semna hun hi IGP (Hqrs) John Neihlaia chuan kaihruaiin Mizoram DGP Devesh Chandra Srivastava IPS pawhin thu a sawi a. He Disc hi Mizoram Police mi leh sa te zawng zawng hnena sem tur niin, a hmahruai atan nimin khan PHQ hnuaia Unit hrang hrang aiawhte hnenah sem a ni.