Dr. R. Lalthangliana’n Shillong-ah mi pawimawh kawm

Health Minister Dr. R. Lalthangliana chuan Inrinni zan khan Shillong-ah North East Centre for Technology Application and Reach (NECTAR), National Medical Commission (NMC) leh North Eastern Indira Gandhi Regional Institute of Health and Medical Sciences (NEIGRIHMS) hotute a kawm.

Dr. R. Lalthangliana hian Inrinni zan khan Shillong-a Mizoram House-ah North East Centre for Technology Application and Reach (NECTAR) hotu pawimawhte kawmin NECTAR hnuaia Scheme hrang hrangte a sawipui a, heng scheme kaltlanga Mizoram tana hmalak theihna tur awmte sawiho niin, NECTAR hotute chuan Mizoram nen tangduna a tul anga hmalak chhunzawm zel an inhuam thu an lo sawipui a ni. NECTAR hi Autonomous Society niin, Department of Science & Technology, Government of India hnuaia awm an ni a, Shillong, Meghalaya-ah Headquarter an nei a ni.

NECTAR hi India hmarchhak State pasarihte tana din a ni a, tunlai thiamna (technology) thar ber ber hmang tangkai chunga hmasawnna kawng sial hi an hna ber niin, a bik takin Agro & Food Processing, Renewable Energy, Bamboo Applications, Geo Spatial Applications, Employment & Livelihood Generation leh Communication-ah an inthlurbing deuh a ni.

Hemi hnu hian Dr. R. Lalthangliana hian Dr Aruna V. Vanikar, President (UG) Medical Education Board, National Medical Commission (NMC) leh Dr Nalin Mehta, Director, NEIGRIHMS, Shillong te nen inkawm lehin Zoram Medical College (ZMC) hmasawnna leh tih changtlun dan turte an sawiho a, NEIGHRIMS leh ZMC thawhho dan turte bakah ZMC than zelna tura hmalak ngaite an sawiho a ni.

Dr. R. Lalthangliana hi Pathianni khan Guwahati let lehin YMCA North East India Region (YMCA-NEIR) President a nihna angin YMCA-NEIR hotute nen Assam Chief Minister Dr Himanta Biswa Sarma chu hmuin YMCA-NEIR tan Guwahati-ah ram pe turin an thlen a ni.

Comments

Popular News (Last 30 Days)

LPG man bithliah thar