The Mizoram Village Council Bill, 2022 hmawr bawk chhoh tan a ni tawh

Mizoram sawrkar-a Local Administration Department (LAD) Officer te chuan nimin khan an Department chhunga peng hrang hrangte hnathawh hnathawh thlirletna hun SIRD&PR Conference Hall, Durtlang-ah neiin he hun hmanpuitu LAD Minister chuan The Mizoram Village Council Bill, 2022 chu hmawr bawk chhoh tan a nih thu a sawi.

LAD hmalakna thlirletna hunah hian LAD Minister chuan an Department hmalakna te tarlangin, tuna VC Dan kan hman mek, The Lushai District Councils-Act 1956 thlakna tur ‘The Mizoram Village Council Bill, 2022’ chu a hmawr bawk chhoh tan a nih thu sawiin, tunah hian Law & Judicial Department-ah Vet turin a thang mek thu leh he Act thar hmang hian VC-te thuneihna leh hnathawh dan hrang hranga duhthusam tawk lohna lai awm te a theih ang ang chinfel a nih beisei thu a sawi a. LAD hnuaia Scheme hrang hrang kaltlanga Village Council-te hnathawh leh tanpuina pekchhuah te hi a Nodal Department, a bikin VC-te nghenchhan ber DLAO leh LAO-ten an pawisa dawn te a nihna ang takin khawtlang mipuite tana chhen fakawm tur an siam ngei em tih te enpuia, a tul angin Technical Support pek kawngah te, an Cash Book leh account vawn that kawngah pawh enpuia, thawhhona tha tak nei turin a chah a. Sawrkarin VC te hmasawnna tura kawng hrang hranga sum leh pai a sen zawng zawngte hi a lo thlawnin a luanral mai lohnan mipui sum a nih ang ngeiin a hlawkna tak tak chu mipuiin an telin, an chhawr tangkai ngei tur a ni, a ti a. Kumtin a MoPR in a buatsaih, National Panchayat Award inelnaah VC tam zawk an tel theihnan record vawn kawngah te, VC hnathawk tha leh a ngaihna hria an rawn chhuah belh zel theihnan VC te chawk phurtu leh fuihtu lo ni zel turin a ngen bawk a ni.

He hunah hian LAD Minister chuan 15th Finance Commission Grant kaltlanga hmalakna te, Panchayati Raj System nei ve lo State ten 14th Finance Commission Grant kan dawn loh aia pek min pek, Excluded Area Grant chungchanga hmalakna te leh Rashtriya Gram Swaraj Abhiyan (RGSA) Scheme chungchanga hmalakna te a sawi a. VC House thar sak, thawmthat leh VC House-a Common Service Centre dah chung-changa hmalakna te pawh sawiin, RGSA Scheme hnuaiah e-Governance ah Computer la dawng lo VC 591 ten an dawn vat theih nan hmalak a nih thu a sawi a. DPRC building la nei lo District- Hnahthial, Khawzawl, Lawngtlai leh Saitual-ah building sa tura hmalakna kalpui mek a nih thu bakah VC ten anmahni kutkhawih a sum an thawhchuahna tur Project kalpui mekte pawh a tarlang bawk.